އާދައިގެ ކްލަބެއްގެ ގޮތުގައި އޮތް ކްލަބް އީގަލްސް ކޮޅަށް ޖަހައި ރާއްޖޭގެ އެންމެ ވަރުގަދަ ކްލަބަށް ހަދައި، ދިވެހި ފުޓުބޯޅަ އިންގިލާބުކޮށްލި ނަން މަޝްހޫރު ކޯޗު އިހުސާން އަބްދުލް ގަނީ (ސާންތީ) ނިޔާވެއްޖެ އެވެ.

ސާންތީ ނިޔާވީ ކެންސަރު ބައްޔަށް، ޓްރީޓޮޕް ހޮސްޕިޓަލުގައި ފަރުވާދެމުން ދަނިކޮށެވެ.

ގައުމީ ފުޓްބޯޅަ ޓީމުގެ އެސިސްޓަންޓް ކޯޗުގެ މަގާމުގައި 2001 އިން 2008 އަށް މަސައްކަތްކުރި ސާންތީ މަޝްހޫރުވެގެން ދިޔައީ ކްލަބް އީގަލްސްގެ ކޯޗުގެ މަގާމުންނެވެ. 2011 އިން 2017އަށް އީގަލްސްގެ ކޯޗު ކަމުގައި، ޒުވާން ކުޅުންތެރިން އުފައްދައި ވަރުގަދަ ޓީމެއް ބިނާކުރި އެވެ. ފުރަތަމަ ޑިވިޝަނަށް އީގަލްސް ގެންގޮސްދީ، ޕްރެސިޑެންޓް ކަޕްގެ ފައިނަލަށް ތިން ފަހަރު ދަތުރުކޮށް، އެއް ފަހަރު ތަށި ނެގި އެވެ.

އެ ކްލަބުގެ ކޯޗުގެ މަގާމުން ވަކިވުމަށް ފަހު ސާންތީ ވަނީ އެފްއޭއެމްގެ ޓެކްނިކަލް ޑިރެކްޓަރުގެ މަގާމުު، 19 އަހަރުން ދަށުގެ ގައުމީ ޓީމުގެ ހެޑް ކޯޗުކަން ކޮށްފަ އެވެ. ދެން ކްލަބު އޭދަފުށީގެ ކޯޗުކަން، އޭގެ ފަހުން ޔުނައިޓެޑް ވިކްޓްރީއަށް ކޯޗުކަން ކުރި އެވެ.

ސާންތީ އަލުން އީގަލްސްގެ ކޯޗުކަމާ ހަވާލުވީ 2023 ވަނަ އަހަރުގެ ފެބްރުއަރީ މަހު އެވެ. އެކަމަކު ބަލި ހާލަތު ހުރި ގޮތުން އެ އަހަރުގެ ޖޫން މަހު ކޯޗުކަމުން ސާންތީ ވަކިވި އެވެ. އެއަށް ފަހު ފުޓްބޯޅައިގެ ރަސްމީ މަގާމެއް އޭނާ އަދާއެއް ނުކުރެ އެވެ.