ކައުންސިލްތަކުގެ އިންތިހާބުގައި ސިޓީ ކައުންސިލްތަކުގެ ގޮނޑިތައް އިންތިހާބުކުރާނެ ދާއިރާތައް ކަނޑައަޅާފައިވާ ވަގުތީ ރިޕޯޓް އާންމުކޮށްފި އެވެ. 

އީސީގެ ވަގުތީ ރިޕޯޓްގައިވާ ގޮތުން ސިޓީތަކުގެ ދާއިރާތައް ކަނޑައަޅާފައިވާ ގޮތަކީ:

• ހދ. ކުޅުދުއްފުށި ސިޓީއަށް މޭޔަރާއެކު 7 ކައުންސިލަރުން އިންތިހާބުކުރާނެ
• އައްޑޫ ސިޓީއަށް އިންތިހާބު ކުރާނީ މޭޔަރު ހިމަނައިގެން 11 މެމްބަރުން.. މީގެ ތެރެއިން އަންހެނުންނަށް ކަނޑައަޅާފައިވަނީ 4 ގޮނޑި އެވެ.
• ގދ. ތިނަދޫ ސިޓީއަށް އިންތިހާބުކުރާނީ މޭޔަރު ހިމަނައިގެން 7 މެމްބަރުން. އަންހެނުންނަށް ހާއްސަކޮށްފައިވަނީ ދެ ގޮނޑި.
• ފުވައްމުލައް ސިޓީއަށް އިންތިހާބުކުރާނީ ސިޓީގެ މޭޔަރާއެކު 9 މެމްބަރުންނެވެ. އޭގެ ތެރެއިން އަންހެނުންނަށް ހާއްސަކޮށްފައިވަނީ 3 ގޮނޑި އެވެ.

އީސީގެ ވަގުތީ ރިޕޯޓުގައި ބުނާ ގޮތުގައި 2،000 އަށްވުރެ އާބާދީ މަދުވުމުން 3 ކައުންސިލަރުން އިންތިހާބު ކުރަން ޖެހޭނީ 133 ރަށަކެވެ. އެއީ 399 ކައުންސިލަރުންނާއި އަންހެނުންގެ ކޮމެޓީތަކަށް 399 މީހުންނެވެ.

ތިން ކައުންސިލަރުން އިންތިހާބު ކުރަންޖެހޭ ރަށްރަށުގައި އަންހެނުންނަށް ހާއްސަކޮށްފައިވަނީ އެއް ގޮނޑި އެވެ. 

އަދި އެ ރިޕޯޓްގައިވާ ގޮތުން އާބާދީ 2،000 އަށްވުރެ ބޮޑުވުމުން 5 ކައުންސިލަރުން އިންތިހާބުކުރަން ޖެހެނީ 46 ރަށެއްގައި އެވެ.

އެ ރިޕޯޓަށް ޝަކުވާ ހުށަހެޅުން މި މަހުގެ 15 ގެ ނިޔަލަށް، ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9:00 އިން މެންދުރު ފަހު 3:00 އަށް އަދި ހުކުރު ދުވަހު މެންދުރުފަހު 03:00 އިން ހަވީރު 05:00 އަށް ހުށަހެޅޭނެ ކަމަށް އީސީން ބުންޏެވެ. .