މާލެ ސިޓީ ކައުންސިލުން ކޮންމެ ރޯދަ މަހަކު ބާއްވަމުން އަންނަ ގުރުއާން މުބާރާތުގެ ތެރެއިން މި އަހަރުގެ މަދަހަ މުބާރާތް ލައިވް ކުރަން އިދިކޮޅު އެމްޑީޕީގެ މަސްލަހަތު އޮންނަ ރާއްޖެ ޓީވީއަށް 1.7 މިލިއަނެއްހާ ރުފިޔާ އަށް ދީފި އެވެ. 

ސިޓީ ކައުންސިލުގެ ވެބްސައިޓުގައި ޕްރޮކިއުމެންޓް މައުލޫމާތުތަކުގައިވާ ގޮތުން މި އަހަރުގެ މަދަހާ މުބާރާތް ލައިވް ކުރުމަށް ރާއްޖެ ޓީވިއަށް އެވޯޑުކޮށްފައިވަނީ މިދިޔަ ޑިސެމްބަރު މަހު އެވެ. 

އެގޮތުން ލައިވްކުރަން ރާއްޖެ ޓީވީއާ ހަވާލުކޮށްފައިވަނީ 1،682،488.80ރ އަށެވެ. 

މައުލޫމާތު ހޯދައި ލިބިގަތުމުގެ ގާނޫނުގެ ދަށުން އަމިއްލަ ގޮތުން މާލެ ސިޓީގެ މޭޔަރު ކަމަށް ވާދަކުރާ އަހުމަދު އައިހަމް ވަނީ މަދަހަ މުބާރާތުގެ މަސައްކަތްތައް އެވޯޑުކުރި ކުންފުނިތަކުގެ މައުލޫމާތު ހޯދަން އިންފޮމޭޝަން ކޮމިޝަން (އައިކޮމް) އަށް އާރްޓީއައި ހުށަހަޅާފައެވެ.

އައިކޮމް އިން ދިން މައުލޫމާތު ހިއްސާކޮށް އައިހަމް ވަނީ މަދަހަ މުބާރާތް ލައިވްކުރުން ދައުލަތުގެ މީޑިއާ، ޕީއެސްއެމްއާ ހަވާލުނުކުރި ކީއްވެތޯ ސުވާލު އުފައްދާފަ އެވެ.