ރާއްޖެއަށް ވަގަށް އެތެރެކުރަނިކޮށް ހިފަހައްޓާފައި ހުރި ދެ ކޮންޓެއިނަރު ސިނގިރޭޓު ވަގަށް ނެގި މައްސަލައިގައި އިތުރު މީހަކު ރޭ ހައްޔަރުކޮށްފި އެވެ.

ފުލުހުން މިދިޔަ އޭޕްރިލް މަހުގެ 26 ގައި ކަސްޓަމްސްއިން ހިފަހައްޓާފައި، އެމްޕީއެލްގެ ހަވާލުގައި ހުރި ދެ ކޮންޓެއިނަރުގެ ސިނގިރޭޓު ވަގަށް ނެގި މައްސަލަ ފެންމަތިވީ މި މަހެވެ. ދެ ކޮންޓެއިނަރުގައި ހުރި ޖުމުލަ 13.6 މިލިއަން ސިނގިރޭޓު ވަގަށް ނަގާފައިވާ ކަމަށް ފުލުހުން ބުންޏެވެ.

ފުލުހުން ބުނީ ވަގަށް ނެގި ދެ ކޮންޓެއިނަރުގެ ބައިތައް ތިލަފުށިން މިދިޔަ އާދިއްތަ ދުވަހު ހޯދާފައިވާ ކަމަށެވެ.

ފުލުހުން ބުނީ ވައްކަމަށް ފަންޑްކުރުމުގެ ތުހުމަތުގައި މިހާރު ހައްޔަރުކޮށްފައި ތިބި ހަތަރު މީހުންގެ އިތުރުން އިތުރު މީހަކު ވެސް ރޭ ހައްޔަރުކޮށްފައިވާ ކަމަށެވެ.

އެއީ، 52 އަހަރުގެ ދިވެހި ފިރިހެނެއް ކަމަށް ފުލުހުން ބުންޏެވެ.

ސިނގިރޭޓް ވައްކަމުގެ މައްސަލާގައި ހަތަރު މީހަކު މީގެ ކުރިން ހައްޔަރުކޮށްފައިވެ އެވެ

އެއީ، ލޮޓަސް ފިހާރައިގެ ވެރިޔާ އަހުމަދު އާރިފް (އާއްޓޭ)އާއި އެޕޯލޯ ހޯލްޑިންސްގެ ވެރިޔާ މުހައްމަދު ވަހީދު (ދިގަލި)އާއި ކަސްޓަމްސްގައި ކުރިން މަސައްކަތްކުރި އަދި މިހާރު މިފްކޯގެ މެނޭޖަރެއްގެ މަގާމުގައި ހުރި މުއާޒް އަލީގެ އިތުރުން ކަސްޓަމްސްގެ މުވައްޒަފެއް ކަމަށްވާ ޒިވާރު އިސްމާއިލެެވެ.