އެމްޕީއެލް ބަނދަރުގައި ބަހައްޓާފައި ހުއްޓާ، 13 މިލިއަން ސިނގިރޭޓާއެކު ދެ ކޮންޓެއިނަރެއް ވަގަށް ގެންދިޔަ މައްސަލާގައި ދައުވާކުރުމަށް އެދި ޕްރޮސެކިއުޓަ ޖެނެރަލް (ޕީޖީ) އޮފީހަށް ފޮނުވައިފި އެވެ. 

މި މައްސަލާގައި ހައްޔަރުކުރި މީހުންގެ ތެރެއިން ދެ ވިޔަފާރިވެރިން، އެޕޯލޯގެ ވެރިޔާ މުހައްމަދު ވަހީދު (ދިގަލި) އާއި އަހުމަދު އާރިފް (އާއްޓޭ) ބަންދުން ދޫކޮށްލީ، ޕީޖީ އޮފީހުން އެދިގެން ކޯޓުންނެވެ. 

ޕީޖީ އޮފީހުން ބުނި ގޮތުގައި އެ ދެ މީހުން ދޫކޮށްލަން އެދުނީ އެ ދެ މީހުންގެ މައްޗަށް ކުރެވޭ ތުހުމަތަކީ ކުށް ރޭވުން ކަމަށް ވެފައި, ކުށުގައި އަމަލީ ގޮތުން ބައިވެރިވި ކަމަށް ބާރު ދޭ ހެއްކެއް ނެތުމުންނެވެ.

އެ ދެ މީހުންގެ އިތުރުން ހަސަން އަބްދުއްރަހްމާން، ލިންކް/ކ. ތުލުސްދޫ ވެސް ބަންދުން ދޫކޮށްލި އެވެ. އޭނާ ދޫކޮށްލަން ވެސް ޕީޖީން އެދުނީ ވައްކަމުގައި އަމަލީ ގޮތުން އުޅުނު ކަމުގެ ތުހުމަތު ކޮށްފައި ނެތުމުންނެވެ. 

އޭގެ އިތުރުން މުހައްމަދު ޝަރީފް، ދަފްތަރު ނަންބަރު ރސ. 1355އަކީ މި މައްސަލަ ހުށަހެޅުނުއިރު ބަންދުގައި ހުރި މީހެއް ނޫނެވެ.

މި މައްސަލާގައި މިހާރު ބަންދުގައި ތިބި މީހުންނަކީ:

1. މުއާޒު އަލީ، ހެންވޭރު ނިއުހެޕިނަސް / މ. މާލެ (މިފްކޯގެ ޖެނެރަލް މެނޭޖަރު)
2. ޒިވާރު އިސްމާއިލް، މެދުރީގެ / ހދ. ވައިކަރަދޫ (ކަސްޓަމްސްގެ ޑިޕާޓްމަންޓެއްގެ އިސް ވެރިއެއް)
3. އަހުމަދު ޝަހީމް، ނޫރަލީގެ / ހދ. ވައިކަރަދޫ (އެމްޕީއެލްގެ މުވައްޒަފެއް)
4. އަހުމަދު ފިރުސާން، ހެންވޭރު ރުމޭނިޔާ / ކ. މާލެ (އެމްޕީއެލްގެ މުވައްޒަފެއް)
5. ހުސައިން ސާމިހު، ޗާނދަނީގެ / ސ. ހިތަދޫ (އެމްޕީއެލްގެ މުވައްޒަފެއް)
6. އާދަމް ވަހީދު، ކެނެރީގެ / ނ. މިލަދޫ (ކޮންޓެއިނަރު ގެންދިޔަ ދޯނީގެ ކައްޕި)
7. މުހައްމަދު އަލަމިން މިއާ، ބަންގްލަދޭޝް

މި މީހުން ބަންދުގައި ބެހެއްޓީ ވައްކަމުގައި އަމަލީ ގޮތުން ބައިވެރިވި ކަމުގެ ތުހުމަތު އޮތުމުންނާއި ބައެއް މީހުންނަކީ ދައުލަތުގެ ވަޒީފާތަކުގައި ތިބެގެން ރަސްމީ ހައިސިއްޔަތު ނަހަމަ ގޮތުގައި ބޭނުން ކުރި ކަމުގެ ތުހުމަތު އޮތް މީހުންނަށް ވާތީ ކަމަށް ޕީޖީ އޮފީހުން ބުންޏެވެ.