މި އަހަރުގެ އެޕްރީލް 26 ވަނަ ދުވަހު މޯލްޑިވްސް ކަސްޓަމްސް ސާވިސްއިން ހިފަހައްޓާފައި ހުރި 2 ކޮންޓެއިނަރުގެ ސިނގިރޭޓު މޯލްޑިވްސް ޕޯޓްސް ލިމިޓެޑް، ހުޅުމާލެ އިންޓަނޭޝަނަލް ޓާމިނަލްގައި ބަހައްޓާފައި ހުއްޓައި ވަގަށް ނަގައިފައިވާ މައްސަލައެއްގައި އިތުރު މީހަކު ހައްޔަރުކޮށްފި އެވެ. 

މީޑީއާތަކަށް މިއަދު ފޮނުވި މެސެޖެއްގައި ފުލުހުން ބުނީ، އެ މައްސަލާގައި އެ މީހާ ހައްޔަރުކުރީ މި މަހުގެ 12 ވަނަ ދުވަހު ކަމަށެވެ. އެއީ ބަންގްލަދޭޝްއަށް ނިސްބަތްވާ މުހައްމަދު އަލަމިން މިއާ (36އ) އެވެ.

އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން ޝަރީއަތް ނިމެންދެން ބަންދު ކުރުމަށް ވަނީ އަމުރުކޮށްފައިވެ އެވެ. 

މި މައްސަލައިގެ ތުހުމަތުގައި މިހާތަނަށް ޖުމުލަ 10 މީހަކު ހައްޔަރުކޮށް މައްސަލަ ގެންދަނީ ތަހުގީގު ކުރަމުންނެވެ. 

އެއީ، މުހައްމަދު ވަހީދު (ދިގަލި)، އަހުމަދު އާރިފް، ލޮޓަސްގެ ވެރިޔާ، މުއާޒު އަލީ، ޒިވާރު އިސްމާއިލް، ހަސަން އަބްދުއްރަހްމާން، އާދަމް ވަހީދު, އަހްމަދު ޝަހީމް އަދި ހުސެން ސާމިހުގެ އިތުރުން އަހުމަދު ފިރުސާން އެވެ.