މާލެ ދަތުރުކުރަމުންދިޔަ މުދާ އުފުލާ ބޯޓެއްގައި ރޯވެ އަނދަމުން އެބަދެއެވެ. 

އެނގިފައިވާ ގޮތުގައި ރޯވެ އަނދަމުންދަނީ މާލެ އާއި ތ އަތޮޅާ ދެމެދު ދަތުރުކުރާ ލ އަތޮޅު ބޯޓެއްކަމުގައިވާ ހޮޅުދޫ ބޯޓުގައެވެ.

އެ ބޯޓުގައި ރޯވީ ތ އަތޮޅު ކަނޑޫދޫން މުދާ ބަރުކޮށްގެން، މާލެއަށް ދިއުމަށް ދަތުރު ފެށިތާ ކުޑައިރުކޮޅެއް ނުވެ ކަނޑޫދޫ ނެރާ ދިމާލުން ބޭރުންނެވެ. ނަމަވެސް ރޯވި ސަބަބެއް ސާފެއް ނޫނެވެ. 

އެ ބޯޓުގައި އަދިވެސް ރޯވެ އަނދަމުންދާއިރު އެކަކު ފިޔަވައި އޭގައި ތިބި މީހުން ވަނީ ސަލާމަތްކޮށް ކަނޑޫދޫއަށް ގެންގޮސްފައެވެ. އަދި އެކަކު ގެއްލިގެން ހޯދަމުންދާކަން އެނގިފައިވެއެވެ. 

ނުފެންނަނީ ލ. މާވަށަށް ނިސްބަތްވާ 25 އަހަރުގެ އަލީ މުޝްފިގް މުހައްމަދެވެ.

ޖުމުލަ 18 މީހުން ދަތުރުކުރަމުން ދިޔަ ދޯނިން 17 މީހަކު ސަލާމަތްކޮށްފައިވާ ކަމަށް ސިފައިން ބުންޏަސް، އެއިން މީހަކަށް އަނިޔާއެއްވީ ކަމެއް ސިފައިން އަދި ނުބުނެ އެވެ. މައުލޫމާތު ލިބޭ ގޮތުގައި ދެ މީހަކަށް ކަނޑޫދޫ މަރުކަޒުގައި ފަރުވާ ދެމުންދެ އެވެ.

އެންޑީއެފުން ބުނީ ހޮޅުދޫ ބޯޓުގައި ރޯވެ، އަނދަމުންދާތީ ކައްދޫ ފަޔާ ސްޓޭޝަނުން ހަރަކާތްތެރިވަމުން އަންނަ ކަމަށެވެ.