ފުވައްމުލައް ސިޓީގައި މިހާތަނަށް ނުބޭއްވޭ ފަދަ ފެންވަރު މަތި، އަގުހުރި އަދި ފެންވަރު ރަނގަޅު ފުޓްސަލް މުބާރާތެއް ކަމުގައިވާ "ބޮޑުބެ ޗެލެންޖް 2025" ބޭއްވުމަށް ބޮޑުބެ.ކޮމްއިން ތައްޔާރުވަމުންދާ ކަމަށް އެފަރާތުން ހާމަކޮށްފިއެވެ.

މި މުބާރާތަކީ ދިވެހިރާއްޖޭގެ އެންމެހައި ސިޓީތަކާއި، ރަށްތަކާއި، އަވަށްތަކާއި، މުއައްސަސާތަކާއި ކުންފުނިތަކުގެ އިތުރުން ރަޖިސްޓަރޑް ކްލަބް، ޖަމްޢިއްޔާ ޖަމާޢަތްތަކުގެ ޓީމުތަކަށް ހުޅުވާލެވިފައިވާ މުބާރާތެކެވެ. މުބާރާތް އިންތިޒާމުކުރާ ފަރާތުން ބުނީ މިފަދަ ފުޅާ ދާއިރާއެއްގައި ބައިވެރިވެވޭގޮތަށް ހުޅުވާލުމުގެ މަޤްޞަދަކީ ޤައުމީ ފެންވަރުގައި ފުޓްސަލް ކުރިއެރުވުމާއި، މުބާރާތްތަކުގައި ވާދަކުރުމުގެ ފުރުޞަތު ވީހާވެސް ގިނަ ފަރާތްތަކަށް ހޯދައިދިނުން ކަމަށެވެ.

މުބާރާތުގެ މައިގަނޑު މަޤްޞަދުތަކުގެ ތެރޭގައި އަވަށު، ރަށު، އަތޮޅު އަދި ޒޯން ފެންވަރުގައި ފުޓްސަލް ޓީމުތައް ތަމްސީލުކުރުމުގެ ފުރުޞަތު ފަހިކޮށްދިނުމާއި ޤައުމީ ފެންވަރުގައި ހުނަރުވެރި، ޖޯޝާއި ފޯރި ގަދަ، އަދި އާޓިސްޓިކް ޗަލާކިކަން ދައްކުވައިދޭ ކުޅުންތެރިން އުފެއްދުން ހިމެނެއެވެ.
ބޮޑުބެ.ކޮމްއިން ފާހަގަކުރި ގޮތުގައި މި މުބާރާތަކީ ހަމައެކަނި ކުޅިވަރީ ހަރަކާތެއްގެ ގޮތުގައި ނުދެކި، އިޖްތިމާޢީ ގުޅުންތައް ބަދަހިކޮށް، ޤައުމީ އެއްބައިވަންތަކަން އާލާކުރުމަށް ބާރުއަޅާ މުބާރާތެކެވެ. އަދި ޒުވާނުންގެ މެދުގައި ދުޅަހެޔޮ ސިއްޙަތެއްގައި ތިބުމަށް ކުޅިވަރު ކުޅޭނެ އިންތިޒާމް ހަމަޖައްސައިދިނުމަކީވެސް މި މުބާރާތުގެ އަމާޒުތަކުގެ ތެރޭގައި ހިމެނޭ ކަމެކެވެ.

މި މުބާރާތަކީ ދިވެހިރާއްޖޭގެ ފުޓްސަލް ކުޅިވަރު ކުރިއެރުވުމަށް ބާރުއެޅުމާއި، އެއްބައިވަންތަ ޖީލެއް ބިނާކުރުމަށް މަސައްކަތްކުރުމުގެ މަޤްޞަދުގައި ބާއްވާ މުބާރާތެއްކަން ބޮޑުބެ.ކޮމްއިން ވަނީ ފާހަގަކޮށްފައެވެ.

ފުވައްމުލަކުގައި ބޭއްވުމަށް ހަމަޖެހިފައިވާ "ބޮޑުބެ ޗެލެންޖް 2025" ފުޓްސަލް މުބާރާތުގައި ބައިވެރިވުމުގެ ފުރުޞަތު ހުޅުވާލައިފިއެވެ. މި މުބާރާތުގައި ބައިވެރިވުމަށް ޝައުޤުވެރިވާ ފަރާތްތަކުން ބޮޑުބެ.ކޮމް އިން ދޫކުރާ ފޯމު ފުރިހަމަކުރުމަށްފަހު، ބައިވެރިވުމުގެ ފީގެ ގޮތުގައި 2,500 ރުފިޔާ ދައްކަންޖެހެއެވެ.
މުބާރާތުގައި ބައިވެރިވުމުގެ ސުންގަޑިއަކީ 2025 އޭޕްރިލް 20 ވާ ބުދަ ދުވަހުގެ 14:00 އެވެ. ސުންގަޑި ހަމަވުމަށްފަހު ބައިވެރިވާ ޓީމުތަކުން ލޭޓް ރެޖިސްޓްރޭޝަން ފީގެ ގޮތުގައި އިތުރު 500 ރުފިޔާ ދައްކަންޖެހޭނެއެވެ.

ބޮޑުބެ.ކޮމްގެ ސީއީއޯ އަޙްމަދު ސައީދު މި މުބާރާތާ ގުޅޭގޮތުން ވާހަކަދައްކަވަމުން، "މި މުބާރާތުގެ ސަބަބުން ފުވައްމުލައް ސިޓީގެ ފުޓްސަލް ވަސީލަތްތައް ތަރައްޤީވެ، ޤައުމީ ފެންވަރުގެ މުބާރާތްތައް ބޭއްވުމަށް މަގުފަހިވެގެން ދިޔުމާއި، ރާއްޖޭގެ އެކި ކަންކޮޅުތަކުގެ ޒުވާނުންނަށް ފުޓްސަލް ކުޅިވަރުގައި ވާދަކުރުމުގެ ފުރުޞަތު ލިބި، ޤައުމީ ފެންވަރުގެ ކުޅުންތެރިން އުފެއްދުމަށް މަގުފަހިވެގެންދާނެކަމަށް އުންމީދުކުރަން" ކަމަށް ވިދާޅުވިއެވެ. އަދި މުބާރާތް އިންތިޒާމުކުރާ ފަރާތުން ބުނާ ގޮތުގައި ބޮޑުބެ ޗެލެންޖް ފުޓްސަލް މުބާރާތަކީ ދިވެހި ކުޅިވަރުގެ ތާރީޚުގައި ފާހަގަކޮށްލެވޭ މުހިންމު ހަރަކާތެއްގެ ގޮތުގައި ދެއްކުމާއި، މުސްތަޤުބަލުގައި ރާއްޖޭގެ ފުޓްސަލް ކުޅިވަރު ތަރައްޤީކުރުމަށް މަގުފަހިކޮށްދޭނެ މުހިންމު ފިޔަވަޅެކެވެ.
މުބާރާތާ ގުޅޭ އިތުރު މަޢުލޫމާތު ބޮޑުބެ.ކޮމްގެ އިދާރާއިން ލިބޭނެ ކަމަށާއި، މުބާރާތުގައި ބައިވެރިވުމަށް ޝައުޤުވެރިވާ ފަރާތްތަކުން ވީ އެންމެ އަވަހަކަށް ރަޖިސްޓަރީވުމަށް މުބާރާތް އިންތިޒާމުކުރާ ފަރާތުން ވަނީ އިލްތިމާސްކޮށްފައެވެ.