މިއަދު ތައިލެންޑުގެ ބެންކޮކާއި މިޔަންމާއަށް އެރި ބާރުގަދަ ބިންހެލުމާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތައިލެންޑްގެ ބޮޑުވަޒީރު ޕެޓޮންގްޓާން ސިނޮވަޓްރައަށް ތައުޒިޔާ ފޮނުވައިފިއެވެ.

ރައީސްގެ ތައުޒިޔާގެ މެސެޖުގައި ބިންހެލުމުގައި މަރުވި މީހުންގެ އާއިލާތަކަށާއި ގެއްލުން ލިބުނު މީހުނަށް އިހްލާސްތެރިކަމާއިއެކު ހަމްދަރްދީ ފޮނުއްވައިފައިވެއެވެ. އަދި ގެއްލިފައިވާ މީހުން ހެޔޮހާލުގައި ތިއްބާ ފެނުމަށާއި ޒަހަމްވެފައިވާ މީހުނަށް އަވަސް ޝިފާއެއް ދެއްވުމަށް އެދިވަޑައިގަންނަވާކަމަށް އެ މަނިކުފާނުގެ މެސެޖުގައިވެއެވެ.

މީގެ އިތުރުންވެސް ރައީސް ވިދާޅުވެފައިވަނީ މި ދަނޑިވަޅުގައި ދިވެހި ރައްޔިތުން ތިބީ ތައިލެންޑްގެ ރައްޔިތުންނާއެކުގައި ކަމަށެވެ. އަދި މީހުން ސަލާމަތް ކުރުމުގެ މަސައްކަތާއި ގެއްލުން ލިބުނު ސަރަހައްދު އަލުން އާރާސްތުކުރުމުގެ މަސައްކަތް އޮމާންކަމާއި އެކު ކުރިއަށް ދާނެ ކަމަށް އުންމީދު ކުރައްވާކަމަށްވެސް ރައީސްގެ ތައުޒިޔާގެ މެސެޖުގައިވެއެވެ.

މި ހާދިސާގައި މިހާތަނަށް އެ ގައުމުން 150 މީހުން މަރުވެފައިވާ ކަމަށް ކަށަވަރުވެފައިވާއިރު، ގިނަ އިމާރާތްތަކަށް ބޮޑެތި ގެއްލުންތަކެއް ވަނީ ވެފައެވެ.

މީގެ އިތުރުން މިހާތަނަށް ރިޕޯޓުތަކުން ދައްކާގޮތުގައި މި ބިންހެލުމުގެ އަސަރު ބެންގްކޮކްގެ އިތުރުން އިންޑިއާ، ބަންގްލަދޭޝް، ލާއޮސް އަދި ޗައިނާއަށް ކުރާނެކަމަށް އެނގިފައިވެއެވެ 

މިއަދު މެންދުރު 13:00 ގައި ބެންގްކޮކްއަށް އެރި މި ބިންހެލުމުގައި ސާޅީހަށްވުރެ ގިނަ މީހުން އިމާރާތްތަކުގެ ދަށުވެ އެހެނިހެން ގެއްލުންތައްވެފައިވެއެވެ. ނަމަވެސް އެ ގައުމުގައި ތިބި ދިވެހީންގެ ހާލު ރަނގަޅުކަމަށާއި މި ބިންހެލުމުގެ ސަބަބުން އެއްވެސް ދިވެއްސަކަށް އެއްވެސްކަހަލަ ހާނިއްކައެއް ވެފައިނުވާކަމަށް ތައިލެންޑު ސަފީރު ފުއާދު ތައުފީގު "ކުރިއަށް" މީޑިއާއަށް ކަށަވަރުކޮށްދެއްވައިފައިވެއެވެ.