މިއަދު ތައިލެންޑުގެ ބެންގްކޮކާއި މިޔަންމާއަށް އެރި ބިންހެލުމާއި ގުޅިގެން އުރީދޫއިން އެ ކުންފުނީގެ ކަސްޓަމަރުނަށް ތައިލެންޑަށް ހިލޭ ގުޅޭނެގޮތް ހަދައިދީފިއެވެ.

އުރީދީން ބުނެފައިވަނީ މިއަދު ބެންގްކޮކަށް އައި ބިންހެލުމާއި ގުޅިގެން މި ހިތާމަވެރި ދަނޑިވަޅުގައި އެ ގައުމުގައި ތިބި ދިވެހިންނަށް އެމީހުންގެ އާއިލާތަކަށް މިރޭ 12 ޖެހުމާއި ހަމައަށް ހިލޭ ގުޅޭނެގޮތް ހަދާދީފައިވާކަމަށެވެ. އަދި މިވަގުތުގައި ރައްޓެހިންނާއި އާއިލާގެ މީހުންގެ ހާލު ބެލުމަށް ފަސޭހަވެގެންދާނެކަމަށްވެސް އުންމީދުކުރާކަމަށެވެ.

މިއަދު މެންދުރު 13:00ގައި ބެންގްކޮކްއަށް އެރި މި ބިންހެލުމުގައި ސާޅީހަށްވުރެ ގިނަ މީހުން އިމާރާތްތަކުގެ ދަށުވެ އެހެނިހެން ގެއްލުންތައްވެފައިވެއެވެ. ނަމަވެސް އެ ގައުމުގައި ތިބި ދިވެހީންގެ ހާލު ރަނގަޅުކަމަށާއި މި ބިންހެލުމުގެ ސަބަބުން އެއްވެސް ދިވެއްސަކަށް އެއްވެސްކަހަލަ ހާނިއްކައެއް ވެފައިނުވާކަމަށް ތައިލެންޑު ސަފީރު ފުއާދު ތައުފީގު "ކުރިއަށް" މީޑިއާއަށް ކަށަވަރުކޮށްދެއްވައިފައިވެއެވެ.

މިހާތަނަށް ރިޕޯޓުތަކުން ދައްކާގޮތުގައި މި ބިންހެލުމުގެ އަސަރު ބެންގްކޮކްގެ އިތުރުން އިންޑިއާ، ބަންގްލަދޭޝް، ލާއޮސް އަދި ޗައިނާއަށް ކުރާނެކަމަށް އެނގިފައިވެއެވެ.