ބޭސް ސިޓީ ފޯޖުކޮށްގެން އާސަންދަ އިން 136,700 ރުފިޔާގެ ބޭސް ނެގި މައްސަލައެއް ފެންމަތިވެއްޖެ އެވެ. 

މި މައްސަލަ ފެންމަތިވީ އޮޑިޓް އޮފީހުން މިއަދު އާންމުކުރި 2019 އިން ފެށިގެން 2024 ގެ ނިޔަލަށް ދައުލަތުގެ ހެލްތު އިންޝުއަރެންސް ސްކީމްގެ އޮޑިޓް ރިޕޯޓުންނެވެ.

އޭގައިވާ ގޮތުން މާލޭގައި ދިރިނޫޅޭ މީހެއް ނަމަވެސް މާލޭގެ ފާމަސީތަކުން، ފޯޖުކޮށްފައިވާ ބޭސް ސިޓީތަކަށް ބޭސް ނަގައި ވިޔަފާރިކުރަމުން ދިޔަ އެވެ. 

ތުހުމަތުވާ މީހާ ބޭސް ނަގަމުން ދިޔައީ އޭނާގެ ބައްޕަގެ ނަން މަތީގައި ކަމަށް ވެސް އޮޑިޓް ރިޕޯޓްގައިވެ އެވެ. 

މި މައްސަލަ 20 ފެބްރުއަރީ 2023 ގައި މާލޭގެ ހޮސްޕިޓަލަކުން ފުލުހަށް އާސަންދައިން ރިޕޯޓްކޮށްފައިވާ ކަމަށް ވެސް ބުންޏެވެ. ނަމަވެސް މާ ބޮޑު ފިޔަވަޅެއް އާސަންދައިން ނާޅާ ކަމަށް ވެސް އޮޑިޓް ރިޕޯޓްގައިވެ އެވެ.

ފެބްރުއަރީ 2023 އިން ފެށިގެން އޭޕްރިލް 2024 ގެ ނިޔަލަށް މާލޭގެ ފާމަސީތަކުން 112,586 ރުފިޔާގެ ބޭސް އަދި އައްޑޫ ހޮސްޕިޓަލުން 25,080 ރުފިޔާގެ ބޭސް ނަގާފައިވެ އެވެ.