ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ކުރީގެ ރައީސް ބައްސާމް އަދީލް ޖަލީލް އިތުރު 5 އަހަރަށް ޖަލަށް ލުމަށް ކުރިމިނަލް ކޯޓުން މިއަދު ހުކުމްކޮށްފި އެވެ. 

ބައްސާމްގެ މައްޗަށް ހުކުމް މި ކުރީ، 2018ވަނަ އަހަރު އެފްއޭއެމްއަށް ލިބުނު ފައިސާގެ ތެރެއިން 10,000 ޑޮލަރު ބައްސާމްގެ އެކައުންޓަށް ޖަމާކޮށް އަމިއްލަ ވިޔަފާރީގައި އިންވެސްޓްކުރި ކަމަށް ތުހުމަތުކުރާ މައްސަލާގައެވެ. 

ބައްސާމްގެ މައްޗަށް ހިޔާނާތުގެ ކުށުގެ ދައުވާއާއި މަނީ ލޯންޑަރިންގެ ދައުވާ ވެސް މި މައްސަލާގައި އުފުލި އެވެ. ހިޔާނާތުގެ ކުށް ސާބިތުވާ ކަމަށް ކަނޑައަޅައި ހަތަރު އަހަރަށް ޖަލަށް ލުމަށް ކޯޓުން މި މަހު 8ގައި ހުކުމްކުރި އެވެ. އެ ދުވަހު މަނީ ލޯންޑްރިންގެ ދައުވާއަށް ހުކުމެއް ނުކުރެ އެވެ.

މަނީ ލޯންޑަރިންގެ ދައުވާއަށް ހުކުމް ކުރަނީ މިއަދު ބޭއްވި އަޑުއެހުމުގަ އެވެ. އަދި ބައްސާމް 154,000 ރުފިޔާއިން ޖޫރިމަނާކޮށް އެ ފައިސާ 6 މަސް ދުވަހު ތެރޭގައި ދެއްކުމަށް ވެސް ކޯޓުން ހުކުމްކުރި އެވެ.