ސްޕެނިޝް ލަލީގާގަައި އެތުލެޓިކޯ މެޑްރިޑް ބަލިކުރުމަށްފަހު ބާސެލޯނާއިން ތާވަލުގެ އެއްވަނައަަށް ޖެހިލައިފިއެވެ.

މިރޭ ކުޅުނު އެ މެޗުގެ 70 މިނެޓާހަމައަށް ދިޔައިރު ވެސް 2-0 ގެ ނަތީޖާއަކުން މޮޅުވެފައި އޮތީ އެތުލެޓިކޯއެވެ.

އެ ޓީމުން ވަނީ މެޗުގެ ފުރަތަމަ ހާފުގެ އެންމެ ފަހު މިނެޓުގައި ގޯލުޖަހައި ލީޑު ނަގައިފައެވެ. ގުއިލިއާނޯ ސިމިއޯނޭ ތަނަވަސްކުރި ފުރުސަތަކުން އެ ގޯލުޖެހީ ހޫލިއަން އަލްވަރޭޒްއެވެ.

މެޗުގެ 70 ވަނަ މިނެޓުގައި ކޯނޯ ގަލަގާ ތަނަވަސްކުރި ފުރުސަތަކުން އެލެކްސެންޑާ ސޯލޯތު ވަނީ ގޯލެއްޖަހައި ލީޑު އިތުރަަށް ފުޅާކޮށްފައެވެ.

ނަމަވެސް އޭގެ ފަހުން ބާސެލޯނާއިން ވަނީ 4 ގޯލުޖަހައި މެޗުގެ ނަތީޖާ އަނބުރާލައިފައެވެ.

މެޗުގެ 72 ވަނަ މިނެޓުގައި އިނީގޯ މާޓިނޭޒް ދިން ޕާހަކުން ރޮބާޓް ލެވަންޑޯސްކީ ވަނީ ގޯލެއްޖަހައި ނަތީޖާ ހަމަހަމަކޮށްފައެވެ. އޭގެ ފަސް މިނެޓުފަހުން ރަފީނިއާ ނެގި ހުރަހަކުން ފެރާން ޓޮރެސް ވަނީ ގޯލެއްޖަހައި މެޗުގެ ނަތީޖާ ހަމަހަމަކޮށްފައެވެ.

މެޗުގެ ފުރިހަމަ ވަގުތު ހަމަވެގެން އިތުރުވަގުތުގެ ގޮތުގައި ދެއްކި ވަގުތުގައި ލަމީން ޔަމާލް ވަނީ ގޯލެއްޖަހަައި ލީޑުނަގައިދީފައެވެ. އަދި އިތުރުވަގުތުގެ އެންމެ ފަހު ސިކުންތު ކޮޅުގައި ޓޮރެސް ވަނީ ގޯލެއްޖަހައި ލީޑު ފުޅާކޮށްފައެވެ.

އެ މޮޅާއެކު ބާސާ އެއްވަނައިގައި އޮތީ 27 މެޗު ކުޅެގެން 60 ޕޮއިންޓާއެކުއެވެ. މެޗުން ބަލިވި އެތުލެޓިކޯ 28 މެޗު ކުޅެގެން 56 ޕޮއިންޓާއެކުއެވެ. ދެވަނައިގައި ރެއާލް މެޑްރިޑް އޮތީ 28 މެޗު ކުޅެގެން 60 ޕޮއިންޓާއެކުއެވެ. ބާސާއަަށް އެއްވަނަ ލިބެނީ ފައިދާ ގޯލުގެ ތަފާތުންނެވެ.