ބޭރު ފައިސާ މާރުކުރުމުގެ ގާނޫނުގެ ދަށުން 150މިލިއަން  ޑޮލަރު ބޭންކުތަކަށް މާރުކޮށްފައިވާކަމަށް ރައީސް ވިދާޅުވެއްޖެއެވެ.

މިއަދު ފަށައިގެން ކުރިއަށް ގެންދާ "ރައްޔިތުންނާ އެކު" ޕޮޑްކާސްޓްގެ ތެރެއިން ރައީސް ވިދާޅުވީ ބޭންކުތަކުން ޑޮލަރު މާރުކުރުން ނުވަތަ ޑޮލަރު ޖަމާކުރުން ލާޒިމްކުރާ ބޭރު ފައިސާ އާއި ބެހޭ ގާނޫނެއް މި އަހަރުގެ ޖަނަވަނީ މަހުގެ އެއްވަނަ ދުވަހު އަމަލުކުރަން ފަށައިފައިވާކަމަށެވެ. މި ގާނޫނުގެ ދަށުން ބޭރު ފައިސާގެ އާމްދަނީ ބޭންކުތަކަށް މާރުކުރަންޖެހޭ ކަމަށާއި އެކަމުގެ ސަބަބުން މިވީ ކުޑަ މުއްދަތުގެ ތެރޭގައި 150މިލިއަން ޑޮލަރު ބޭކުތަކަށް މާރުކޮށްފައިވާކަމަށެވެ.

ރައީސް ވިދާޅުވީ މި ގެނެވުނު ބަދަލުގެ ސަބަބުން ކުރިން ބޭންކުތަކަށް ބޭރު ފައިސާ މާރުކުރަމުން އައި މިންވަރާއި އަޅާ ބަލާއިރު %40 އިންސައްތަ އިތުރުވެފައިވާކަމަށެވެ.

ރައީސް އިތުރަށް ވިދާޅުވީ މިހާރު 95%އިންސައްތަ ގާނޫނާއި އެއްގޮތަށް އަމަލުކުރަމުން އަންނަކަމަށެވެ. އަދި ބާކީ 5%އިންސައްތަވެސް ގާނޫނުގެ ތެރެއަށް ވެއްދުމަށް ގަނޫނެއް ތަންފީޒު ކުރާނެކަމަށެވެ.

"މިހާރު 95% ގާނޫނާ އެއްގޮތަށް މާރުކުރަމުންދަނީ، ބާކީ 5%ވެސް މީގެ ތެރެއަށް ވައްދާނަން.. ގާނޫނު ތަންފީޒުކުރާނަން.. އެ މަސައްކަތް އެމްއެމްއިންދަނީ ކުރަމުން...މިކަމުގައި އެއްބާރުލުންވެސް ލިބޭ." ރައީސް ވިދާޅުވިއެވެ. 

އިތުރަށް ރައީސް ވިދާޅުވެފައިވަނީ މި ބަދަލުގެ ސަބަބުން  ރައްޔިތުންނަށް ހުރި ދަތިތަކަށް ލުޔެއް ލިބިގެންދާނެ ކަމަށާއި، ފަތުރުވެރިކަުގެ ދާއިރާއަށްވެސް އިތުރު ކުރިއެރުމެއް ލިބިގެންދާނެ ކަމަށެވެ. 

އަދި ދިވެހީންނަށް މިހާރު ބޭންކު ރޭޓުގައި ދޫކުރާ 500ޑޮލަރުގެ ބަދަލުގައި 1000 ޑޮލަރަށްވުރެ އިތުރު އަދަދަކަށް އެ އަދަދު އަރާނެކަމަށާއި، ކްރެޑިޓް ކާޑުގެ ލިމިޓް ދެގުނައަށް އިތުރުވެގެންދާނެކަމަށް ރައީސް ވިދާޅުވިއެވެ.