ދިވެހި ދަރިވަރުންނަށް އިތުރު ފުރުސަތުތައް ފަހިކޮށްދިނުމުގެ ގޮތުން، ބަންގްލަދޭޝްގެ ޔުނިވަސިޓީތަކުގެ ބްރާންޗްތައް މާލޭގައި ގާއިމުކޮށްދޭން، ރާއްޖެއިން އެދިއްޖެ އެވެ. 

ރާއްޖެއިން އެކަމަށް އެދިފައިވަނީ ރާއްޖޭގައި ހުންނަ ބަންގްލަދޭޝްގެ ސަފީރު ޑރ. އެމްޑީ ނަޒްމުލްއާ ރާއްޖޭގެ ހަޔާއެޑިއުކޭޝަން މިނިސްޓަރު ޑރ. އަލީ ހައިދަރުއާ ދެބޭފުޅުން ދެމެދު އިއްޔެ ބޭއްވި ބައްދަލުވުމުގަ އެވެ. 

ބަންގަލްދޭޝް ނޫސްތަކުން ރިޕޯޓްކޮށްފައިވާ ގޮތުން އެ ބައްދަލުވުމުގައި ހަޔާ އެޑިއުކޭޝަން އާއި، ޓްރެއިންނަތަކާއި، ހުނަރު ތަރައްގީކުރުމާއި، އިންސާނީ ވަސީލަތްތައް ތަރައްގީކުރުމުގެ ދާއިރާއިން ދެގައުމުގެ ގުޅުން އިތުރަށް ބަދަހިކުރެއްވުމާ ބެހޭގޮތުން ދެބޭފުޅުން މަޝްވަރާ ކޮށްފައިވެ އެވެ.

ބަންގްލަދޭޝްގައި ތައުލީމީ ފެއާތައް ބޭއްވުމާއި، ދިވެހި މެޑިކަލް ދަރިވަރުންނަށް އިންޓާންޝިޕް ޕްރޮގްރާމްތައް ފުޅާކުރުމާއި، ބަންގްލަދޭޝްގެ ތަޖުރިބާކާރުންގެ އެހީގައި ފަންނީ އަދި ވޮކޭޝަނަލް ޓްރެއިނިންގ (ޓިވެޓް) ކުރިއެރުވުމަށް ކުރެވިދާނެ ބައެއް ދާއިރާތަކާ ބެހޭގޮތުންވެސް މަޝްވަރާ ކުރުވުނެވެ.

އެ ބައްދަލުވުމުގައި ބަންގްލަދޭޝްގެ ސަފީރު ވަނީ، ރާއްޖެ އާއި ބަންގްލަދޭޝްއާ ދެގައުމުގެ ދެމެދުގައި އޮންނަ ގާތް ގުޅުން އިތުރަށް ބަދަހިކުރެއްވުމަށް ބަންގްލަދޭޝް ސަރުކާރުން ތައްޔާރަށް އޮތް ކަމުގައި ވިދާޅުވެފަ އެވެ. 

ރާއްޖޭގައި ބަންގްލަދޭޝް ޔުނިވާސިޓީގެ ބްރާންޗުތައް ގާއިމުކޮށްދޭން މިނިސްޓަރު ހައިދަރު އެދިވަޑައިގެންފައިވާއިރު، ދިވެހި ގިނަ އަދަދެއްގެ ދަރިވަރުން ދަނީ ބަންގްލަދޭޝްގައި މެޑިކަލް ދާއިރާއިން ތައުލީމު ހާސިލުކުރަމުންނެވެ.