ބިން ހެލުން އައި ބެންގްކޮކަކީ ދިވެހީން ވެސް އާންމުކޮށް ގޮސް އުޅޭ، ތައިލެންޑްގެ ވެރިރަށެވެ. ބެންގްކޮކަށް ބިން ހެލުމުގެ އަސަރުކޮށް ބައެއް އިމާރާތްތައް ވެސް ސުންނާފަތިވި އިރު އެ ތަނުގައި ގިނަ ދިވެހީން އެބަ ތިއްބެވެ. 

ނަމަވެސް މި ބިންހެލުމުގައި ދިވެހިންގެ އެއްވެސް މީހަކަށް ގެއްލުމެއް ނުވާ ކަމަށް ރާއްޖެއިން ބެންގްކޮކްއަށް ކަނޑައަޅުއްވައިފައި ހުންނަވާ ސަފީރު ފުއާދު ތައުފީގު 'ކުރިއަށް މީޑިއާ"އަށް ވިދާޅުވިއެވެ.

ފުއާދު ވިދާޅުވީ ދިވެހިންގެ އެއްވެސް މީހަކު ހަށިގަނޑަށް ހާނިއްކައެއް ނޫނީ ގެއްލުމެއް ވެސް ވެފައި ނުވާ ކަމަށެވެ. ނަމަވެސް މި ބިންހެލުމުގެ ސަބަބުން މިވަގުތު އެ ގައުމުގައި ތިބި ދިވެހިން އަދިވެސް ތިބީ ބިރުވެރި ކަމެއްގައި ކަމަށް ފުއާދު ވިދާޅުވިއެވެ. 

"ވަރަށް ބޮޑު ބިރުވެރިކަމެއް ލިބުނު ހުރިހާ އެންމެނަށް އެންމެނަށް ވެސް. ވަރަށް ބޮޑު ބިންހެލުމެއް ވިއްޔާ އައީ،" ސަފީރުގެ ހައިސިއްޔަތުން މި ވަގުތު ތައިލެންޑްގައި ދިރިއުޅުއްވަމުން ގެންދަވާ ފުއާދު ފޯނުން އިންޓަވިއު ދެއްވަމުން ވިދާޅުވި އެވެ.

ފުއާދު އިތުރަށް ވިދާޅުވީ ބިންހެލުން ކުރިމަތިވީ ވަގުތު ހުރިހާ އެންމެނަށް ވެސް އިމާރާތްތަކުން ނިކުތުމަށް އަންގާފައިވާކަމަށާއި، އެތަނުގެ ގަޑިން ހަވީރު 5:30 އާއި 6:00 ދޭތެރޭގައި ދިވެހިން ހިމެނޭގޮތަށް އެންމެން ވެސް ތިބީ އިމާރާތްތަކުން ނިކުމެ ކަމަށް ފުއާދު ވިދާޅުވިއެވެ. އެއަށްފަހު އެންމެންވެސް އެބައެއްގެ އިމާރާތްތަކަށް ވަނުމުގެ ހުއްދަ ދިނީ އިމާރާތްތަކުގައި ދިރިއުޅެން ސޭފްތޯ ބެލުމަށް ފަހު ކަމަށް ފުއާދު ވިދާޅުވިއެވެ. 

މިއަދު ބެންކޮކްގެ މިޔަމްމާ ސަރަހައްދުގެ ސަގައިންއަށް މި އެރި ބިންހެލުމުގައި 40އަށްވުރެ ގިނަ މީހުން އިމާރާތްތަކުގެ ދަށުވަފައިވާކަމަށް ހަބަރުތަކުން އެނގިފައިވެއެވެ. އަދި މި ބިންހެލުމުގެ އަސަރު ބެންގްކޮކްގެ އިތުރުން އިންޑިއާ، ބަންގްލަދޭޝް. ލައޮސް އަދި ޗައިނާއަށްވެސް ކުރާނެކަމަށް ރިޕޯޓްތަކުން އެނގިފައިވެއެވެ. އަދި މި ބިންހެލުން އައިސްފައިވަނީ ކަނޑުގެ 10ކިލޯ މީޓަރު އަޑިން ކަމަށާއި، ބިންހެލުން އައިސްފައިވަނީ ރެކްޓަރ މިންގަނޑުން ގާތްގަނޑަކަށް 7.7 މެގެނިޓިއުޑްގެ ބާރު މިނުގައިކަމަށް ރިޕޯޓްތަކުން އެނގިފައިވެއެވެ.  

​