ރާއްޖޭގެ ބައިނަލްއަޤްވާމީ ބަނދަރުތައް ބެލެހެއްޓުން ހަރުދަނާކުރުމާއި، ސަރވެއިލެންސްގެ މަސައްކަތްތައް އިތުރަށް ހަރުދަނާކުރުމުގެ ގޮތުން، ޖަޕާން ސަރުކާރުން 82 ފޫޓުގެ ޕެޓްރޯލް ވެސަލްއެއް މޯލްޑިވްސް ކަސްޓަމްސް ސަރވިސްއަށް ރަސްމީކޮށް ހަދިޔާކޮށްފިއެވެ. މި އުޅަނދު ހަވާލުކުރުމުގެ ރަސްމިއްޔާތު ބާއްވާފައިވަނީ 27 ނޮވެމްބަރ 2025 ވަނަ ދުވަހު ކަސްޓަމްސް ބިލްޑިންގގައެވެ.

މި ރަސްމިއްޔާތު ޝަރަފްވެރިކޮށްދެއްވީ ކަސްޓަމްސްގެ މިނިސްޓަރ، މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ އޮންރަބްލް އަލީ އިޙްސާންއެވެ. ޖަޕާން އިން ދިވެހިރާއްޖެއަށް ކަނޑައަޅުއްވާފައިވާ ސަފީރު މިސް އިޝިގާމީ ރުމީކޯ ވަނީ މި އުޅަނދު ރަސްމީކޮށް ދިވެހި ސަރުކާރާ ހަވާލުކޮށްދެއްވާފައެވެ. ދިވެހި ސަރުކާރުގެ ފަރާތުން މި އުޅަނދާ ހަވާލުވެ ވަޑައިގެންނެވީ މިނިސްޓަރ އަލީ އިޙްސާންއެވެ. މި ޙަފްލާގައި ކޮމިޝަނަރ ޖެނެރަލް ފާތިމަތު ދިޔާނާއާއި ކަސްޓަމްސްގެ އިސްވެރީން ބައިވެރިވެ ވަޑައިގެންނެވިއެވެ.

މި އުޅަނދު ހަދިޔާކުރެވުނީ ޖަޕާން ސަރުކާރުގެ "އިކޮނޮމިކް ކޯޕަރޭޝަން ގްރާންޓް އެކްޓް" ގެ ދަށުންނެވެ. މި އުޅަނދުގެ މައިގަނޑު މަޤްޞަދަކީ ރާއްޖޭގެ ބަނދަރުތަކުގެ ސަލާމަތީ ކަންތައްތައް ވަރުގަދަކުރުމާއި، ބައިނަލްއަޤްވާމީ ގޮތުން އެކި މުދާ އެތެރެކުރާ އަދި ބޭރުކުރާ ބަނދަރުތަކުގެ ސަރވެއިލެންސް ނިޒާމު ހަރުދަނާކުރުމެވެ. ރަސްމިއްޔާތަށްފަހު، މިނިސްޓަރ އަލީ އިޙްސާން އާއި ޖަޕާނުގެ ސަފީރު ރުމީކޯއާއެކު ބައިވެރިވި އެންމެހާ ބޭފުޅުން ވަނީ މާލޭ ކޮމާޝަލް ހާބަރަށް ވަޑައިގެން އުޅަނދު ބައްލަވާލައްވާފައެވެ.

މި ޕެޓްރޯލް ވެސަލް އޮޕަރޭޓްކުރުމަށް ރޭވިފައިވަނީ މޯލްޑިވްސް ނެޝަނަލް ޑިފެންސް ފޯސްގެ ކޯސްޓްގާރޑް އާ މޯލްޑިވްސް ކަސްޓަމްސް ސަރވިސް ގުޅިގެންނެވެ. މި އުޅަނދު ރަނގަޅަށް ބޭނުންކުރުމަށްޓަކައި، އޮޕަރޭޓްކުރުމަށް ބޭނުންވާ ތަމްރީންތައް ޖަޕާން އަދި ދިވެހިރާއްޖޭގައި ވަނީ ހިންގާފައެވެ. މި ތަމްރީން ޕްރޮގްރާމްތަކުގައި ކަސްޓަމްސްގެ 23 އޮފިސަރަކު ބައިވެރިވެފައިވާކަން ފާހަގަކޮށްލެވެއެވެ.

ޖަޕާން ސަރުކާރުން ދިވެހިރާއްޖޭގެ ކަސްޓަމްސްއަށް މިފަދަ ބޮޑު އުޅަނދެއް ހަދިޔާކުރުމަކީ، ދެޤައުމުގެ ދެމެދުގައި އޮތް ގާތް ގުޅުން އިތުރަށް ވަރުގަދަވެ، ރާއްޖޭގެ ބޯޑަރު ސަލާމަތީ ކަންތައްތައް އިތުރަށް ހަރުދަނާވެގެންދާނެ ކަމެއްކަމަށް ބެލެވެއެވެ.