އަހަރުގެ އެންމެ މޮޅު ކުޅުންތެރިޔާއަށް ފްރާންސްގެ 'ފްރާންސް ފުޓްބޯލް' މަޖައްލާއިން ދޭ ބެލޮންޑިއޯ އެވޯޑް ބޭނުން ނުވާކަމަށް ބާސެލޯނާގެ ތަރި ޕެޑްރީ ގޮންޒަލޭޒް ބުނެފިއެވެ.

މި ސީޒަންގައި ބާސެލޯނާއިން ދައްކަމުން އަންނަ ތަފާތު މޮޅު ކުޅުމުގެ އަސްލަކީ ޕެޑްރީ ކަމަށް ގިނަ ބަޔަކު ގަބޫލުކުރެއެވެ.

ޕެޑަރީއަކީ ބާސެލޯނާގެ މެދުތެރެއިން ކުޅުން ރާވާ އިންޖީނުކަމަށް ވެސް ގިނަބަޔަކު އިއްތިފާގުވެއެވެ. އެހެންވެ މި ސީޒަންގައި ޕެޑްރީއަށް ބެލޮންޑިއޯ ހައްގުކަމަށް ވެސް އެ ފަރާތްތަކުން ބުނެއެވެ.

އެ ވާހަކަތަކަށް ރައްދުދީ ޕެޑްރީ ބުނީ ޓީމުގެ މޮޅު ކުޅުމަކީ ޓީމުގެ ހުރިހާ ކުޅުންތެެރިން ދައްކާ މޮޅު ކުޅުމުގެ ސަބަބުން ފެންނަ ކުޅުމެއްކަމަށެވެ.

އޭނާއަށްވުރެ ޓީމުގައި މޮޅަށް ކުޅޭ ކުޅުންތެރިން އެބަތިބިކަމަށް ވެސް އޭނާ ބުންޏެވެ. އެގޮތުން ލަމީން ޔަމާލްއާއި، ރަފީނިއާގެ އިތުރުން ލެވަންޑޯސްކީ ދައްކަނީ މޮޅު ކުޅުމެއްކަމަށް ޕެޑްރީ ބުންޏެވެ.

ޕެޑްރީ ބުނީ ބެލޮންޑޯ އެވޯޑް ހޯދަން މަސައްކަތް ވެސް ނުކުރާކަމަށާއި، އެ އެވޯޑް ބޭނުމެއް ވެސް ނޫންކަމަށް އޭނާ ބުންޏެވެ.

ޕެޑްރީ ބުނީ އޭނާ މަސައްކަތްކުރަނީ ޓީމުގެ މޮޅު ކުޅުން ދަމަހައްޓަންކަމަށާއި، ޓީމަށް ތައްޓެއް ލިބޭނަމަ އޭނާ ވަރަށް އުފާވާނެކަމަށް އުމުރުން 22 އަހަރުގެ ޕެޑްރީ ބުންޏެވެ.

މި އަހަރު އަދި އެންމެ މެޗަކުން ވެސް ބަލިނުވާ ބާސެލޯނާ އެންމެ ފަހުން ކުޅުނު 10 މެޗުގެ ތެރެއިން 7 މެޗުގެ އެންމެ މޮޅު ކުޅުންތެރިޔާގެ މަގާމު ހޯދީ ޕެޑްރީއެވެ.

ޕެޑްރީގެ މޮޅު ކުޅުމާއެކު ބާސެލޯނާއިން ވަނީ މި ސީޒަންގައި ސްޕެނިޝް ސުޕަ ކަޕް ކާމިޔާބުކޮށްފައެވެ. އަދި އެ ޓީމު އޮތީ ލަލީގާގެ އެއްވަނައިގައެވެ. ކޮޕަޑެލްރޭ ސެމީ ފައިނަލްގައި އޮތް ބާސެލޯނާ ވަނީ ޗެމްޕިއަންސް ލީގު ކުއާޓާ ފައިނަލުން ޖާގަ ހޯދައިފައެވެ. ބާސެލޯނާގެ އަމާޒަކީ އެ ހުރިހާ ތައްޓެއް ހޯދުމެވެ.

ހުރިހާ ތައްޓެއް ބާސެލޯނާއިން ހޯދައިފިނަމަ ޕެޑްރީ ބެލޮންޑިއޯ އެވޯޑަށް ވާދަކުރާނެއެވެ. މިހާރު ވެސް ބެލޮންޑިއޯ އެވޯޑުގެ ފެވަރިޓުންގެ ލިސްޓުގައި ޕެޑްރީއާއެކު ރަފީނިއާ އަދި ލަމީން ޔަމާލް ހިމެނެއެވެ.