ބަލިޖެހުމުގެ ކުރިން އަޅަންޖެހޭ ފިޔަވަޅުތައް އެޅުމަށް "އިންވެސްޓްކުރަން" ނުވަތަ އެކަމަށް ހާއްސަ ސަމާލުކަމެއް ދެއްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެއެވެ. 

"ރައްޔިތުންނާ އެކު" ސިލްސިލާ ޕޮޑްކާސްޓްގެ ދެ ވަނަ އެޕިސޯޑުގައި ވާހަކަފުޅު ދައްކަވަމުން ރައީސް ވިދާޅުވީ ބަލި ޖެހުމުގެ ކުރިން އަޅަންޖެހޭ ފިޔަވަޅުތައް އެޅުމަކީ މި ސަރުކާރުން ހާއްސަ އިސްކަމެއް ދެއްވާ ކަމެއް ކަމަށާއި، ބަލިޖެހުމުގެ ކުރިން ބަލިމީހާއަށް ދޭންޖެހޭ ފަރުވާ ދިނުމަށް ސިއްހީ ދާއިރާއިން އިސްކަމެއް ދެއްވުމަށް މި ސަރުކާރުން މަސައްކަތް ކުރައްވާނެކަމަށެވެ. 

ރައީސް ވިދާޅުވެފައިވަނީ އެ މަނިކުފާނުގެ ސިޔާސަތުގެ ދަށުން ދުންފަތުގެ އިސްތިއުމާލުކުރުމުން ޖީލެއް ދުރުކުރުވުމަކީ "ޕްރިވެންޓިވް ހެލްޓް ކެއާ" ނުވަތަ ބަލި ޖެހުމުގެ ކުރިން އަޅަންޖެހޭ ފިޔަވަޅުތައް އެޅުމުން ހާސިލްކުރެވިދާނެ ކަމެއް ކަމަށެވެ. މިގޮތުން ތަރުކާރީ އާއި މޭވާގެ ބާވަތްތަކާއި ރަނގަޅު ކާނާ ލިބޭނެ މަގު ފަހިކޮށްދިނުމަށް މަސައްކަތްކޮށްދެއްވާނެކަމަށްވެސް ރައީސް ވަނީ ވިދާޅުވެފައެވެ.

މީގެ އިތުރުންވެސް ރައީސްވަނީ މޫދު ކަސްރަތަކީވެސް ހަށިގަނޑަށް ވަރަށް ފައިދާހުރި ކަމެއްކަން ފާހަގަކުރައްވާފައެވެ. އެގޮތުން މޫދަށް އެރޭނެ ތަންތަން ނެތް ރަށްރަށުގައި މަޝްރޫއުތައް ކުރިއަށް ގެންދާނެ ކަމަށް ރައީސް ވަނީ މިއަދުގެ ޕޮޑްކާސްޓްގައި ވިދާޅުވެފައެވެ.

އަންނަ އަހަރުގެ ނިޔަލަށް ރާއްވަވައިފައިހުރި މަޝްރޫއުތަކުގެ ތެރޭގައި ކޮންމެ ރަށެއްގައި އައުޓް ޑޯ ޖިމަކާއި، ކުޑަކުދިން ބޭރަށް ނިކުމެ އާއިލާ އާއި އެކު ވަގުތު ހޭދަކޮށްލުމަށް ކޮންމެ ރަށެއްގައި ކުޑަކުދިންގެ ޕާކެއްގެ އިތުރުން މާލޭގެ ހަލާކުވެފައިވާ ޕާކުތައް މަރާމާތުކުރުންވެސް ހިމެނެއެވެ. މިގޮތުން ސަލްޓަން ޕާކު މަރާމާތުކުރުމަށް ކުރައްވަމުން ގެންދަވާ މަސައްކަްތް ތަކުގެ މަށްޗަށް ރައީސް ވަނީ އަލިއަޅުއްވާލައްވާފައެވެ. އަދި ސަލްޓަން ޕާކް ތަރައްގީ ކުރައްވާނީ "އެޑްވެންޗަރަސް" ކަންކަން ހިމަނައިގެން ކަމަށަވެސް ރައީސްވަނީ ވިދާލޫވެފައެވެ.

އިތުރަށް ރައީސް ވިދާޅުވީ ސަރުކާރުން ހިންގާ ކުޅިވަރާއި ގުޅުންހުރި މަޝްރޫއުތައް ހިންގަވަނީވެސް " ޕްރިވެންޓިވް ހެލްތް ކެއަރ" ނުވަތަ ބަލި ޖެހުމުގެ ކުރިން އަޅަންޖެހޭ ފިޔަވަޅުތައް އެޅުއްވުމުގެ މަގްސަފުގައި ކަމަށެވެ. ހިތްހަމަޖެހުމާއި، ކުޅިވަރަކީ ރަނގަޅު ސިއްހަތެއްގައި ހުރުމަށް ބޭނުންވާނެ ކަމެއްކަމަށް ރައީސް ފާހަގަކޮށްފައިވެއެވެ.

މިއަދުގެ ޕޮޑްކާސްޓުގައި، އާންމު ޞިއްޙަތު ރައްކާތެރިކުރުމަށް ހިންގޭ ޕަބްލިކް ހެލްތުގެ ކަންކަން ހަރުދަނާ ކުރެއްވުމަށާއި، ދަމަނަވެށީގެ ޚިދުމަތް ކޮންމެ އަތޮޅެއްގައި ދިނުމަށް، މަސައްކަތްޕުޅުތަކެއް ކުރައްވާކަން ރައީސުލްޖުމްހޫރިއްޔާ ވަނީ ޙިއްޞާ ކުރައްވާފައެވެ. އެގޮތުން މި ސަރުކާރުން ތަންފީޒުކުރެއްވުމަށް މަސައްކަތްޕުޅު ކުރައްވަމުން ގެންދަވަނީ ވަށައިޖެހޭ ޞިއްޙީ ޚިދުމަތުގެ ސިޔާސަތެއް ކަމުގައި އެ މަނިކުފާނު ވިދާޅުވިއެވެ. މި ކަންކަން މި ފަދައިން ކުރެވުމާއެކު، ޑޮކްޓަރަށް ދައްކަންޖެހޭވަރު މަދު ކުރެވި، ރާއްޖޭގައި ތިބެގެން ޞިއްޙީ ޚިދުމަތް ހޯދުމުގެ ފުރުޞަތުތައް ފަހިވެގެންދާނެ ކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދުގެ ޙާލަތު އޮތް ގޮތުން ރާއްޖެއިން ބޭރަށް ގޮސް ޞިއްޙީ ޚިދުމަތް ހޯދަންޖެހޭ ޙާލަތްތައް މެދުވެރިވާ ކަމަށާ، ނަމަވެސް އެއީ ފަސޭހަ ކަމެއް ނޫންކަން ފާހަގަކުރައްވައި، ބަލިޖެހޭ ހިސާބުން، ރާއްޖޭގައި ތިބިގެން ފަރުވާ ކުރެވޭނެ އިންތިޒާމުތައް ހަމަޖެހިފައި އޮންނަންޖެހޭ ކަމުގައި ރައީސުލްޖުމްހޫރިއްޔާ ވަނީ ވިދާޅުވެފައެވެ.

ރައީސުލްޖުމްހޫރިއްޔާ ސިލްސިލާކޮށް ކުރިއަށް ގެންދަންފެށި މި ޕޮޑްކާސްޓަކީ ރައްޔިތުންނާ ވީހާވެސް ގާތުން މައުލޫމާތު ހިއްސާކުރައްވައި، ރައްޔިތުންގެ ހިޔާލުތަކާއި ކަންބޮޑުވުންތައް އަޑު އައްސަވައި، ރައްޔިތުންގެ ސުވާލުތަކަށް ޖަވާބުދެއްވުމުގެ މަގްސަދުގައެވެ. ރައީސްގެ ސިޔާސަތުތައް އެކުލަވާ ލައްވައިފައި ވަނީ ރައްޔިތުންނާއި ގާތުން ކަންކަން ކުރެއްވުމަށް ކަމަށް އެމަނިކުފާނު އަންނަނީ އަބަދުވެސް ވިދާޅުވަމުންނެވެ.