ފުވައްމުލަކުން މުޅި ރާއްޖެއަށް މަޝްހޫރުވި ބާބާ ގާޑިއާގެ ހިދުމަތް ހުޅުމާލެއަށް ފުޅާކުރަން ނިންމައިފި އެވެ. 

ބާބާ ގަޑިއާ އިން ބުނީ ކުރިއަށް އޮތް ތަނުގައި އެ ގާޑިއާގެ ހިދުމަތް ހުޅުމާލެ އާއި ރާއްޖޭގެ އެހެން ސިޓީތަކަށް ފުޅާކޮށް، ރާއްޖޭގެ 'ސްޓްރީޓް ފުޑް'ގެ ސަގާފަތް އަލުން ބައްޓަން ކުރުމަށް ނިންމާފައިވާ ކަަމަށެވެ.

'ފުވައްމުލަކުގެ ސްޓްރީޓް ފުޑް' އަށް އިތުރު ފުރިހަމަ ކަމެއް ގެނެސްދިން ބާބާ ގަޑިއާގެ ވިޔަފާރި ފެށީ 2020 ވަނަ އަހަރުގެ ޖުލައި މަހު އެވެ.

ކޮވިޑް-19 ގެ ބަލިމަޑުކަމުގެ ތެރޭގައި ހަސަން އަތީގު ފެށި ފުޑް ޓްރަކަކީ ކޮލިޓީ ރަނގަޅު ކާނާ ފޯރުކޮށްދިނުމުގެ ގޮތުން އުފަންވި ޓްރަކެކެވެ. އޭރު އެ ވިޔަފާރި ފެށީ ގާޑިޔަލެއް ގޭދޮރުމަތީގައި ބާއްވައިގެން ވަރަށް އާދައިގެ ގޮތަކަށެވެ. އެކަން ފުޅާވެ މިހާރު އެ ޓްރަކަކީ ބެޓެރިން ދުއްވާ މޮބައިލް ބަދިގެއެކެވެ.

ބާބާ ސްޕެޝަލް ޝަވަރްމާ އާއި ފްރެޝް ބްރޫޑް ޗައި އަށް ހާއްސަވެފައިވާ ބާބާ ގާޑިއާ އަކީ މީހުންގެ މެދުގައި މަގުބޫލުކަން ހޯދާފައިވާ 'ބްރޭންޑެކެވެ'.

ބާބާ ގާޑިއާ އެފްއެންޑްބީ ކެޓަގަރީން ޕޮޕިއުލާ އެވޯޑަށް ނޮމިނޭޓްވި އެވެ.