ފަލަސްތީނުގެ ޣައްޒާ އަތުލައި، އެތަނުގައި ރިވިއެރާއެއް ހެދުމަށް އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި ހުށަހެޅުއްވުމާ ގުޅިގެން ރާއްޖޭގެ ކުރީގެ ރައީސް މައުމޫން ޢަބްދުލްޤައްޔޫމް ވަނީ ފާޑުވިދާޅުވެފައެވެ.

އެކްސްގައި ކުރެއްވި ޕޯސްޓެއްގައި ރައީސް މައުމޫން ވިދާޅުވެފައިވަނީ، "ކިތަންމެ ބާރުގަދަ މީހަކަށްވެސް ބައިނަލްއަޤްވާމީ ޤާނޫނާ ޚިލާފަށް މިފަދަ ކަމެއް ކުރެވިގެން ނުވާނެ" ކަމަށެވެ.

 

މި މައްސަލަ މިހާ ބޮޑަށް ސަމާލުކަމަށް އައީ ވައިޓް ހައުސްގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއާއެކު ބޭއްވި ބައްދަލުވުމަކަށްފަހު، ޓްރަމްޕް ދެއްކެވި ވާހަކަފުޅުތަކާ ގުޅިގެންނެވެ. އެ ބައްދަލުވުމުގައި ޓްރަމްޕް ވިދާޅުވެފައިވަނީ ޣައްޒާގެ ރައްޔިތުން އެހެން ޤައުމުތަކަށް ބަދަލުކޮށް، އެމެރިކާއިން ޣައްޒާ ހިފައި، އެތަން ތަރައްޤީކުރަން ބޭނުންވާ ކަމަށެވެ.

"އެމެރިކާއިން ޣައްޒާއާ ހަވާލުވާނެ، އެއާއެކު އަޅުގަނޑުމެން މަސައްކަތްތަކެއްވެސް ކުރާނަން. އެތަން ވާނީ އަޅުގަނޑުމެންގެ މިލްކަކަށް،" ޓްރަމްޕް ވިދާޅުވިއެވެ.

ޓްރަމްޕްގެ މި ޕްލޭންގެ ދަށުން، ޣައްޒާގައި މިހާރު ދިރިއުޅޭ ގިނަ ރައްޔިތުން އެހެން ޤައުމުތަކަށް ބަދަލުކޮށް، އެތަނުގައި ދުނިޔޭގެ އެކި ކަންކޮޅުތަކުގެ މީހުންނަށް ދިރިއުޅެވޭނެ ހިތްގައިމު ރިވިއެރާއެއް ހެދުމަށް ވަނީ ހުށަހަޅުއްވާފައެވެ. އަދި މި ޕްލޭންގެ ދަށުން ޣައްޒާގެ އިޤްތިޞާދީ ހަރަކާތްތައް ފުޅާކޮށް، ވަޒީފާއާއި ބޯހިޔާވަހިކަން ކަށަވަރުކޮށްދޭނެ ކަމަށްވެސް ވަނީ ވިދާޅުވެފައެވެ.