އެމްއެމްޕީއާރުސީ ބޮޑު ހިޔާނާތުގެ މައްސަލާގައި ކުރީގެ ބަންޑާރަ ނައިބު އައިޝަތު އާޒިމާ ޝަކޫރުގެ މައްޗަށް ކުރި ދައުވާތައް ނަގައިފި އެވެ. 

ޕްރޮސެކިއުޓާ ޖެނެރަލް އޮފީހުން މިއަދު ބުނީ އާޒިމާގެ މައްޗަށް ދައުވާކޮށްފައިވާ ކުށް ހިނގި ހާދިސާ ހިނގި ކަން ސާބިތު ނުވާ ކަމަށް ސުޕްރީމް ކޯޓުގައި ހުކުމެއް ކޮށްފައި އޮތުމުން އެ ކަމަށް ރިއާޔަތްކޮށްފަ އެވެ. 

ޕީޖީ އޮފީހުން އެ އިޝާރާތްކުރެއްވީ ކުރީގެ ރައީސް އަބަދުﷲ ޔާމީންގެ އެކައުންޓަށް ވަން އެއް މިލިއަން ޑޮލަރަކީ ގއ. ވޮޑަމުލާ ކުއްޔަށް ދޫކޮށްގެން ދައުލަތަށް ލިބެން ޖެހޭ ފައިސާ ކަމަށް ބުނެ ކުރި ދައުވާއަށެވެ.

ކުރިމިނަލް ކޯޓާއި ހައި ކޯޓުގައި ދައުވާ ސާބިތު ނަމަވެސް ސުޕްރީމް ކޯޓުން ހުކުމްކުރީ ޔާމީނުގެ މައްޗަށް ކުށް ސާބިތުނުވާ ކަމަށެވެ. އަދި ޔާމީންގެ އެކައުންޓަށް ވަން އެއް މިލިއަން ޑޮލަރަކީ ދިވެހި ދައުލަތުގެ ފައިސާ ކަން ސާބިތުކޮށް ނުދެވޭ ކަމަށް ހުކުމް ކުރި އެވެ. 

ޔާމީނުގެ ވެރިކަމުގައި ރައީސް އޮފީހުގެ ލީގަލް މިނިސްޓަރަކަށް ހުންނެވި އާޒިމާގެ މައްޗަށް މި މައްސަލާގައި އުފުލީ މަނީ ލޯންޑަރިންނަށް މަގުފަހިކޮށްދިނުމުގެ ކުށުގެ ދައުވާ އާއި ރަސްމީ އިދާރާއަކަށް ދޮގު މައުލޫމާތު ދިނުމުގެ ކުށުގެ ދައުވާ އެވެ. 

އެ ގޮތުން ދައުލަތަށް ލިބެން ޖެހޭ ފައިސާ ވަކި އެކައުންޓަކަށް ޖަމާކުރުމަށް އާޒިމާ ލަފާ ދެއްވައިފައިވާ ކަމަށާއި ދޮގު މައުލޫމާތު ދިން ކަމަށް ވެސް ތުހުމަތު ކޮށްފައިވެ އެވެ. މި ތުހުމަތުތައް ދައުލަތުން ކޮށްފައިވަނީ އެންޓި ކޮރަޕްޝަން ކޮމިޝަން (އޭސީސީ)އިން ހިންގި ތަހުގީގަށް ހަގީގަތާ ޚިލާފު މައުލޫމާތަކެއް އާޒިމާ ދެއްވައިފައިވާ ކަމަށް ބުނެ އެވެ.