އުމްރާގެ މަތިވެރި އަޅުކަމުގައި އުޅުއްވަނިކޮށް އޮޑިޓް ދާއިރާގެ ތަޖުރިބާކާރު، ވައިކަރަދޫ އިބްރާހީމް ރަޝީދު އިއްޔެ އަވަހާރަވެއްޖެ އެވެ. 

މައުލޫމާތު ލިބޭ ގޮތުގައި އޭނާ މައްކާގައި އަވަހާރަވީ، ދެ އުމްރާ ފުރިހަމަ ކުރެއްވުމަށް ފަހު ތިންވަނަ އުމްރާއަށް އިހުރާމު ބަންނަވައިގެން ހުންނަވަނިކޮށެވެ. 

ރަޝީދަކީ ދައުލަތަށް 36 އަހަރު މަސައްކަތްކުރެއްވި ބޭފުޅެކެވެ. އޮޑިޓް އޮފީހުގައި އެތައް އަހަރަކު ހިދުމަތް ކުރެއްވުމަށް ފަހު މާލީ ވުޒާރާގައި ވެސް ވަޒީފާ އަދާކުރެއްވި އެވެ. 

ދައުލަތުގެ ބަޖެޓް ތައްޔާރުކުރުމުގެ އެންމެ އިސް މީހެއްގެ ގޮތުގައި ވެސް އަހަރުތަކެއް ވަން ދެން މަސައްކަތްކުރެއްވި އެވެ. 

އޭނާއަކީ ފަތުރުވެރި ދާއިރާގައި ވެސް ފާހަގަކޮށްލެވޭ އޮޑިޓަރެކެވެ. ވަރަށް ގިނަ ރިސޯޓްތަކުގައި އޮޑިޓަރެއްގެ ގޮތުގައި މަސައްކަތް ކުރެއްވި އެވެ.

އެ ގޮތުން ރާއްޖޭގެ އެންމެ ފުރަތަމަ އެއް ރިސޯޓް، ބަނޑޮހުގައި ދިވެހި އޮޑިޓަރެއްގެ މަގާމު އަދާކުރެއްވީ އޭނާ އެވެ.