އަތޮޅުތަކަށް ދިއުމަށް ލޯންޗު ފެރީގެ ހިދުމަތް ހޯދާ ރައްޔިތުންނަށް މާލެއަށް އަރާ ފޭބުމަށް މިވަގުތު ތަހައްމަލްކުރަން ޖެހިފައިވާ އުނދަގޫތަކަށް ލުޔެއް ހޯދައިދިނުމަށް އެމްޓީސީސީގެ ހެންވޭރު ފެރީ ޓާމިނަލް އަތޮޅު ފެރީތަކަށް ބޭނުންކުރެވޭ ގޮތް ހަދައިފިއެވެ. 

އެމްޓީސީސީން ބުނި ގޮތުގައި ޓާމިނަލް ބޭނުންކުރަން އެ ކުންފުނިން ހުޅުވާލި ފުރުސަތަށް ޝައުގުވެރިކަން ފާޅުކުރީ ހަތް ފަރާތަކުންނެވެ. މިއަދު ވަނީ ފުރަތަމަ އަތޮޅު ފެރީ އެ ޓާމިނަލުން ހިދުމަތް ހޯދައިފައެވެ. 

އެމްޓީސީސީން ބުނީ ދުވާލަކު 15 ލޯންޗަށް އެ ޓާމިނަލުން ހިދުމަތް ދެވޭއިރު، އެއީ 2،000 އެއްހާ މީހުން ކަމަށެވެ. 

އެމްޓީސީސީން އިތުރަށް ބުނި ގޮތުގައި ދަތުރުވެރިން ޓާމިނަލަށް އައިސް ފުރުމާއި ދޭތެރޭ މަޑުކޮށްލުމަށް ހާއްސަ ސަރަހައްދަކާ ދަތުރުވެރިންނަށް ހާއްސަ ފާހާނާ އަދި ބޯފެން ލިބުމުގެ އިންތިޒާމުވެސް ގާއިމްކޮށްފައިވާ ކަމަށެވެ.