މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ފައިނޭޝަލް އިންޓެލިޖެންސް ޔުނިޓް (އެފްއައިޔޫ) ގެ ކުރީގެ ވެރިޔާ އިބްރާހިމް އާތިފް ޝަކޫރުގެ މައްޗަށް އުފުލި ދައުވާ ދައުލަތުން އަނބުރާ ގެނެސްފި އެވެ. 

މި ވަގުތު މި ސަރުކާރުގެ މިފްކޯގެ ސްޓެރެޓެޖިކް ކޮންސަލްޓެންޓްގެ މަގާމުގައި ހުންނެވި އާތިފްގެ މައްޗަށް ދައުވާކުރީ މިދިޔަ ސަރުކާރުގެ ދުވަސްވަރެވެ. 

އާތިފްގެ މައްޗަށް އޭރު މަނީ ލޯންޑްރިންގެ ގާނޫނާ ހިލާފު ވުމުގެ ދައުވާ އުފުލީ އެމްއެމްޕީއާރުސީގެ ބޮޑު ހިޔާނާތުގެ މުއާމަލާތްތަކުގެ މައުލޫމާތު ލިބި ކަމާ ގުޅުން ހުރި އިދާރާތަކަށް ރިޕޯޓް ނުކުރާ ކަމަށް ބުނެ އެވެ. 

ޕްރޮސެކިއުޓަ ޖެނެރަލް އޮފީހުގެ ބޭފުޅަކު ވިދާޅުވި ގޮތުގައި ދައުވާ މުރާޖައާ ކޮށްދިނުމަށް އެދި އާތިފްގެ ފަރާތުން ހުށަހެޅުމުން ކުރެވުނު މަޝްވަރާތަކުގެ ތެރެއިން އާތިފްއާއެކު ނަސޭހަތުގެ އެއްބަސްވުމަކަށް ވަނީ އާދެވިފަ އެވެ.

ނަސޭހަތުގެ އެއްބަސްވުން ހެދީ ތިން އަހަރު ދުވަހަށެވެ.