ވޯލްޑްކަޕް ކޮލިފައިންގައި ފަސޭހަކަމާއެކު އާޖެންޓީނާއިން ބްރެޒިލްގެ މައްޗަށް ކުރިހޯދައިފިއެވެ.

އަންނަ އަހަރު ކުޅޭ ވޯލްޑްކަޕަށް ކޮލިފައިވެ އާޖެންޓީނާ ރޭ ކުޅުނު މެޗު އެ ޓީމު ކާމިޔާބުކުރީ 4-1 ގެ ނަތީޖާއަކުންނެވެ.

ރޭގެ މެޗަށް ނިކުތުމުގެ ކުރިން އާޖެންޓީނާއަަށް ވޯލްޑްކަޕްގެ ޖާގައެއް ކަށަވަރުވީ ކޮލިފައިން ގްރޫޕްގެ ދެވަނައިގައި އޮތް އުރުގުއާއި ބޮލިވިއާއާ އެއްވަރުވެ ތިންވަނައަށް ވެއްޓުމުންނެވެ.

އާޖެންޓީނާގައި ބްރެޒިލްއާ ދެކޮޅަށް ރޭ ކުޅުނު މެޗުގެ 4 ވަނަ މިނެޓުގައި އާޖެންޓީނާއިން ވަނީ ގޯލުޖަހައި ލީޑުނަގައިފައެވެ. އެ ގޯލު އާޖެންޓީނާއަށް ކާމިޔާބުކޮށްދިނީ ހޫލިއަން އަލްވަރޭޒްއެވެ.

މެޗުގެ 12 ވަނަ މިނެޓުގައި އެންޒޯ ފަނާންޑޭޒް ގޯލެއްޖަހައި އާޖެންޓީނާއަށް ލީޑު ފުޅާކޮށްދިނެވެ. ނަމަވެސް މެޗުގެ 26 ވަނަ މިނެޓުގައި މެތުއުސް ކޫނާ ވަނީ ގޯލެއް ކާމިޔާބުކޮށް ބްރެޒިލްއަށް އުންމީދު ހޯދައިދީފައެވެ.

ނަމަވެސް މެޗުގައި މޮޅުކުޅުމެއް ދެއްކި އާޖެންޓީނާއިން ވަނީ މެޗުގެ 37 ވަނަ މިނެޓުގައި ގޯލެއްޖަހައި ތަފާތު ބޮޑުކޮށްފައެވެ. އެ ގޯލު ކާމިޔާބުކޮށްދިނީ އެލެކްސިސް މެކްއެލިސްޓާއެވެ.

މެޗުގައި އާޖެންޓީނާއިން ކާމިޔާބުކުރި ހަތަރުވަނަ ގޯލު  ގިއުލިއާނޯ ސިމިއޯނޭ ކާމިޔާބުކޮށްދިނީ ނިކޮލަސް ޓެގްލެފިއާކޯ ތަނަވަސްކޮށްދިން ފުރުސަތަކުންނެވެ.

މެޗުން މޮޅުވެ އާޖެންޓީނާ 14 މެޗު ކުޅެ ގްރޫޕްގެ އެއްވަނައިގައި ވޯލްޑްކަޕްގެ ޖާގައެއް ކަށަވަރުކުރީ 31 ޕޮއިންޓު ހޯދައިގެންނެވެ.

ދެވަނައިގައި އޮތް އެކުއެޑޯއަށް 14 މެޗުން ލިބުނީ 23 ޕޮއިންޓެވެ. ތިންވަނައިގައި އުރުގުއާއި އަދި ހަތަރުވަނައިގައި އޮތް ބްރެޒިލްއާއި، ފަސްވަނައިގައި އޮތް ޕެރަގުއާއި އަށް 14 މެޗުން ލިބުނީ 21 ޕޮއިންޓެވެ. ހަވަނައިގައި ކޮލަމްބިއާ އޮތީ 20 ޕޮއިންޓާއެކުއެވެ. ހަތްވަނައިގައި ވެނުޒުއޭލާ އޮތީ 15 ޕޮއިންޓާއެކުއެވެ. 

ދެކުނު އެމެރިކާ ބައްރު ކޮލިފޮކޭޝަން ގްރޫޕްގައި ޖުމްލަ 10 ޓީމު ބައިވެރިވެއެވެ. ވޯލްޑްކަޕަށް ސީދާ ކޮލިފައިވާނީ ގްރޫޕްގެ އެންމެ ގިނަ ޕޮއިންޓު ހޯދާ ހަ ޓީމެވެ. ހަތްވަނައަށްދާ ޓީމު ޖެހޭނީ ކޮލިފިކޭޝަން މެޗެއް ކުޅޭށެވެ.