ވޯލްޑްކަޕް ކޮލިފައިންގައި އާޖެންޓީނާ އަތުން ފުޓުބޯޅައިގެ ރަން ތާރީހު އޮންނަ ބްރެޒިލް ހިތި ގޮތަކަށް ބަލިވުމާއެކު އެ ޓީމުގެ ކޯޗު ޑޮރިވަލް ޖޫނިއާ މަގާމުން ވަކިކޮށްފިއެވެ. 

ޑޮރިވަލް މަގާމުން ވަކިކުރީ އާޖެންޓީނާ އަތުން ބަލިވުމާއެކު ބްރެޒިލްގެ ފުޓުބޯޅަ ފެޑްރޭޝަނުން ބަރެޒިލްގެ ގައުމީ ޓީމަށް ނަތީޖާ ނެރެވޭވަރުގެ ކޯޗެއް  ގެނައުމަށް ބޭނުންވާތީއެވެ.

ޑޮރިވަލްގެ ކޯޗުކަމުގައި، ބްރެޒިލްއިން ދަށް ނަތީޖާތަކެއް ހޯދަމުން އަންނާތީ، އޭނާގެ މަގާމާ މެދު ސުވާލުތަކެއް އުފެދިފައިވަނިކޮށް 4-1 ގެ ނަތީޖާއަކުން އާޖެންޓީނާ އަތުން ބަލިވެ އެ ޓީމު ވަނީ ކޮލިފިކޭޝަން ގްރޫޕްގެ ދެވަނަައިން ތިންވަނަ މަގާމަށް ސޮއްސާލައިފައެވެ.

ޑޮރިވަލް ބްރެޒިލްގެ ގައުމީ ޓީމާ ހަވާލުވީ މިދިޔަ އަހަރުއެވެ. އޭނާގެ ކޯޗުކަަމުގައި 16 މެޗު ކުޅެފައިވާއިރު، ބްރެޒިލްއަށް ކަަމިޔާބު ހޯދުނީ އެތަނުން އެންމެ ހަތް މެޗުންނެވެ. އަދި ހަ މެޗުން އެއްވަރުވެ،  ތިން މެޗުން ވަނީ އެ ޓީމު ބަލިވެފައެވެ.

ދެކުނު އެމެރިކާ ވޯލްޑްކަޕް ކޮލިފައިން ގްރޫޕްގެ ހަތަރު ވަނައިގައި ބްރެޒިލް އޮތީ ކުޅުނު 14 މެޗުން ލިބުނު 21 ޕޮއިންޓާއެކުއެވެ. އެއްވަނައިގައި އާޖެންޓީނާ އޮތީ 14 މެޗުން 31 ޕޮއިންޓު ހޯދައިގެންނެވެ. ދެވަނައިގައި އެކުއެޑޯ 23 ޕޮއިންޓާއެކު އޮތްއިރު ތިންވަނައިގައި އުރުގުއާއި އޮތީ 21 ޕޮއިންޓާއެކުއެވެ.

އެ ބައްރުން ވޯލްޑްކަޕް ކޮލިފައިންގައި 10 ޓީމު ވާދަކުރާއިރު، ސީދާ ވޯލްޑްކަޕަށް ކޮލިފައިވާނީ 6 ޓީމެވެ. ހަތްވަނަ ޓީމު ޖެހޭނީ ޕްލޭއޮފް މެޗެއް ކުޅޭށެވެ. އެ ބައްރުން ވޯލްޑްކަޕްގެ ޖާގައެއް އަދި ކަށަވަރުވީ އާޖެންޓީނާއަށް އެކަންޏެވެ.