އަރަބި ލީގުގެ ގާޒާ އާރާސްތުކުރުމުގެ ޕްލޭނަށް ރާއްޖޭން ތާއީދުކުރާ ކަން، އިސްލާމީ ގައުމުތަކުގެ ހާރިޖީ ވަޒީރުންގެ ބައްދަލުވުމުގައި ހާރިޖީ ވަޒީރު ޑރ. އަބްދުﷲ ހަލީލު ހާމަކުރައްވައިފި އެވެ.

އެއީ "އޯގަނައިޒޭޝަން އޮފް އިސްލާމިކް ކޯޕަރޭޝަން" (އޯއައިސީ) އިން ސައުދީ އަރަބިއްޔާގެ ޖިއްދާގައި ބޭއްވި ހާރިޖީ ވަޒީރުންގެ ފެންވަރުގައި ބޭއްވޭ "އެކްސްޓްރާ އޯޑިނަރީ ސެޝަން" ގައި ދެއްވި ތަގުރީރުގަ އެވެ.

ވަޒީރު ދެއްވި ތަގުރީރުގައި އިޒްރޭލުން ހަނގުރާމަ ހުއްޓާލުމުގެ އެއްބަސްވުމާއި ހިލާފު ވެފައި ވާކަން ފާހަގަކުރެއްވި އެވެ. އަދި ވަޒީރު ވަނީ މެދު ކެނޑުމެއްނެތި އިސްރާއީލުން ފަލަސްތީނުގެ ރައްޔިތުންނާއި ދެކޮޅަށް ހިންގަމުންދާ އަނިޔާވެރިކަން ކުށްވެރި ކުރައްވާ އެކަމާއި ކަންބޮޑުވުން ފާޅު ކުރައްވާފަ އެވެ.

ހަނގުރާމައަށް އޮތް ހަމައެކަނި ދެމެހެއްޓެނިވި ހައްލަކީ 1976 ވަނަ އަހަރުގެ ކުރިން ކަނޑައަޅާފައި އޮތް އިންތަކުގެ މަށްޗަށް ބިނާކޮށް، އިރުމަތީ ގުދުސްއަކީ ފަލަސްތީނުގެ ވެރިކަން ކުރާ ރަށްކަމުގައި ކަނޑައަޅައި މިނިވަން އަދި އަމިއްލަ ސިޔާދަތީ ބާރު ހިނގާ ދައުލަތެއްގެ ގޮތުގައި ފަލަސްގީނުގެ ދައުލަތް ގާއިމުކުރުން ކަމަށް ވެސް ހަލީލު ވިދާޅުވި އެވެ.  

މީގެ އިތުރުން ޣައްޒާގެ ހުރިހާ ސަރަހައްދަކަށް ރައްކާތެރި ކަމާއިއެކު ދެމެހެއްޓެނިވި ގޮތެއްގައި އަދި ހުއްޓުމެއްނެތި އިންސާނީ އެހީތެރިކަން ފޯރުކޮށްދިނުމަށް ވެސް ވަޒީރު ގޮވާލެއްވި އެވެ.

އިތުރަށް ވަޒީރު ވަނީ ފަލަސްތީނަށް ފޯރުކޮށްދެމުންދާ އިންސާނީ އެހީތެރިކަމަށް ހުރަސް އެޅޭ ގޮތަށް އިސްރާއީލުން ހިންގަމުންދާ އަމަލުތަކާ ގުޅިގެން "އިންޓަނޭޝަނަލް ކޯޓް އޮފް ޖަސްޓިސް"(އައިސީޖޭ)ގެ އިސްތިޝާރީ ލަފައެއް ހޯދުމަށް ހުށައަޅަފައިވާ މައްސަލައިގައި ވެސް ރާއްޖެއިން ބައިވެރި ވެފައި ވާނެ ކަމަށާއި، އެކޯޓަށް ބަޔާނެއް ހުށައަޅައިފައި ވާނެ ކަމަށްވެސް ހާމަކުރައްވާފަ އެވެ. 

އޯއަސީން ސައުދީ އަރަބިއްޔާގެ ޖިއްދާގައި ބާއްވާ "އެކްސްޓްރާ އޯޑިނަރީ ސެޝަނަކީ" އިސްރާއީލުން ފަލަސްތީނާ ދެކޮޅަށް ހިންގަމުންދާ އަނިޔާވެރި އަމަލުތައް ކުށްވެރިކޮށް، ފަލަސްތީނުގެ ރައްޔިތުން އެމީހުންގެ ބިމުން ފޭބުމަށް ގޮވާލާ ގޮވާލުންތަކާއި ދެކޮޅަށް އަޑު އުފުލުމަށް ބާއްވާ ބައްދަލުވުމެކެވެ.

އޯއަސީއަކީ 57 ގައުމުގެ މަށްޗަށް އެކުލެވިގެންވާ ޖަމްއިއްޔާއެކެވެ. އަދި މި ޖަމިއްޔާ އަކީ އަބަދުވެސް ފަލަސްތީނުގެ ހައްގުގައި ވާލާތު ކުރަމުން އަންނަ ޖަމްއިއްޔާއެކެވެ. ރާއްޖެއިން އަންނަނީ 1976 އިން ފެށިގެން ޖަމްއިއްޔާގެ މެމްބަރެއް ގޮތުގައި އިސްކޮށް ހަރަކާތްތެރިވަމުންނެވެ.