އަންނަ އަހަރު ކުޅޭ ވޯލްޑްކަޕް ކާމިޔާބުކުރެވިއްޖެނަމަ ގައުމީ ޓީމުން ރިޓެއާވާނެކަމަށް އާޖެންޓީނާގެ އެއް ނަންބަރު ކީޕަރު އެމިލިއާނޯ މާޓިނޭޒް ބުނެފިއެވެ.

ބީ ޕްލޭއަށް ދިން އިންޓަވިއުއެއްގައި މާޓިނޭޒް ބުނީ އަންނަ އަހަރު ވޯލްޑްކަޕް ކާމިޔާބުކުރުމަކީ އަމާޒެއް ކަމަށެވެ.

އަންނަ އަހަރު އެމެރިކާއާއި، މެކްސިކޯގެ އިތުރުން ކެނެޑާގައި ހޯސްޓުކުރާ ވޯލްޑްކަޕް ކާމިޔާބުކުރެވިއްޖެ ނަމަ އައު ކުޅުންތެރިންނަށް ފުރުސަތު ދިނުމުގެ ގޮތުން އެއްފަހަރާތް ވާނެކަމަށެވެ.

އެންމެ ފަހުގެ ޗެމްޕިއަން އާޖެންޓީނާގެ އެންމެ މުހިންމު ކުޅުންތެރިޔަކީ އުމުރުން 32 އަހަރުގެ މާޓިނޭޒްއެވެ.

އޭނާ ވަނީ މިދިޔަ ވޯލްޑްކަޕްގެ އެންމެ މޮޅު ކީޕަރުގެ މަގާމު ހޯދައިފައެވެ.

ޒަމާންތަކަކަށް ފަހު އާޖެންޓީނާއިން ކޮޕާ އެމެރިކާގެ ތަށި 2021 ވަނަ އަހަރު ހޯދީ މާޓިނޭޒް ގައުމީ ޓީމުގެ އަންގި މަހާލި ފަހުންނެވެ.

2021 ގައި ގައުމީ ޓީމަށް ކުޅެންފަށައި، މާޓިނޭޒް ވަނީ މިހާތަނަށް ގައުމީ ޓީމަށް 51 މެޗު ކުޅެފައެވެ. ގައުމީ ޓީމާއެކު މާޓިނޭޒް ވަނީ ވޯލްޑްކަޕް އުފުލާލައި، ކޮޕައެމެރިކާ އަދި ފިނަލިސިމާ ކާމިޔާބުކޮށްފައެވެ. 

ދެކުނު އެމެރިކާ ވޯލްޑްކަޕް ކޮލިފިކޭޝަން ގްރޫޕްގެ އެއްވަނައިގައި އޮތް އާޖެންޓީނާ އަކީ މިއަހަރު ވޯލްޑްކަޕަށް ކޮލިފައިވި ތިންވަނަ ޓީމެވެ. އާޖެންޓީނާގެ އިތުރުން ވޯލްޑްކަޕަށް ކޮލިފައިވީ ޖަޕާނާއި، އިރާނުގެ އިތުރުން އޮސްޓްރޭލިއާއެވެ.