އުމްރާއަށް ގެންގޮސްދޭނެ ކަމަށް ބުނެ އާންމުންގެ ބައެއްގެ އަތުން ފައިސާ ނެގުމަށް ފަހު، އޮޅުވާލި މައްސަލައެއް އަނެއް ކާވެސް ފެންމަތިވެއްޖެ އެވެ. 

ފައިސާ ވެސް ދެއްކި ފަހުން އުމްރާއަށް ގެންގޮސްދެވެން ނެތްކަން އަންގާފައި ވަނީ "އަސްކޮއި ހައްޖު ގްރޫޕް"ގެ ހަވާލުގައި އުމްރާއަށް ދާން އުޅުނު 6 މީހަކަށެވެ. އެ މީހުން ބުނެފައިވާ ގޮތުގައި މިދިޔަ އޮކްޓޯބަރުން ފެށިގެން އުމްރާއަށް ދިއުމަށް ދައްކަން ޖެހޭ ހުރިހާ ފައިސާއެއް މިދިޔަ ޖެނުއަރީގެ ނިޔަލަށް ވަނީ ދައްކައި ހަލާސްކޮށްފަ އެވެ. 

އުމްރާއަށް ދާން ތައްޔާރުވަމުން ދިޔައީ ރޯދަ މަހުގެ ފަހު 15 ގެ ދުވަސްތަކާއި ޝައްވާލް މަހުގެ ހަ ރޯދައިގައި ވެސް މައްކާގައި މަޑުކުރާ ގޮތަށެވެ. އެ މީހުން އުމްރާއަށް ގެންދެވެން ނެތްކަން އަންގާފައި ވަނީ، ފުރަން 10 ދުވަހަށް ގާތްވެ، މާލެ އައުމުގެ ހުރިހާ އިންތިޒާމްތަކެއް ވެސް ހަމަޖެއްސި ފަހުން ކަމަށް ވެ އެވެ. 

މި 6 މީހުން އުމްރާއަށް ދިއުމަށް އެ ގްރޫޕަށް ޖުމްލަ 252،000 ރުފިޔާ ދެއްކި އެވެ. 

މި މައްސަލައާ ގުޅިގެން އިސްލާމީ ވަޒީރު ޑރ. މުހައްމަދު ޝަހީމް އަލީ ސައީދު އެކްސްގައި ޕޯސްޓުކުރައްވަމުން ވިދާޅުވީ، އަސްކޮއި ގްރޫޕްގެ މައްސަލަ ވުޒާރާގެ ސަމާލު ކަމަށް އައިސްފައިވާ ކަމަށެވެ. 

މި މައްސަލަ ވުޒާރާއިން ބަލަމުން އަންނަ ކަމަށާއި، އުމްރާއަށް މީހުން ގެންދިއުމުގެ ގަވާއިދާ ހިލާފްވާ ފަރާތްތަކަށް ހަރުކަށި ފިޔަވަޅު އަޅާނެ ކަމަށް ވަޒީރު ވިދާޅުވި އެވެ. ވަޒީރު ޝަހީމް ވިދާޅުވީ، މި ގޮތަށް އުމްރާއަށް މީހުން ގެންދިއުމުގެ އަމަލުކުރާ ފަރާތްތަކާ މެދު މި ފަހުން ވެސް ވާނީ ފިޔަވަޅު އަޅައި ހުއްދަ ބާތިލްކޮށްފައި ކަމަށެވެ. 

އުމްރާއަށް ގެންގޮސް، އިންތިޒާމްތައް ހަމަޖައްސައި ދިނުމުގައި އިހުމާލުވުމާއި، އޮޅުވާލައިގެން ފައިސާ ނެގުން ފަދަ ގިނަ މައްސަލަތަކެއް އަބަދުވެސް ފެންމަތިވެ އެވެ.

އުމްރާއަށް މީހުން ގެންދިއުމުގައި އިހުމާލުވާ މައްސަލަތައް އިތުރުވެ، އިސްލާމީ ވުޒާރާއިން ވަނީ މި ކަންކަން އިތުރަށް ހަރުދަނާ ކުރުމަށް މަސައްކަތްތަކެއް ފަށާފަ އެވެ. އެ ގޮތުން ފާއިތުވި ޖެނުއަރީ މަހު ވެސް އުމްރާއަށް މީހުން ގެންދިއުމުގެ އުސޫލާ ހިލާފްވި 19 ގްރޫޕެއް ޖޫރިމަނާކޮށްފަ އެވެ.

މީގެ އިތުރުން އުމްރާއަށް ގެންދިއުމުގެ ކަންކަން ފުރިހަމަކުރުމަށް ހިތްވަރުދިނުމުގެ ގޮތުން، ކޮންމެ އަހަރެއްގެ އެންމެ ފާހަގަކޮށްލެވޭ ގްރޫޕަށް އެވޯޑު ދޭން ވެސް ވުޒާރާއިން ނިންމި އެވެ.