އެމްބިއުލާންސަށް ޖާގަނުދީ މަގުމަތީ މަޑުކޮށްގެން އޮތް ޕިކަޕްގެ ޑްރައިވަރު ޖޫރިމަނާކޮށް އޭނާގެ ލައިސެންސް ފުލުހުން ހިފަހައްޓައިފި އެވެ. 

ފުލުހުން ބުނި ގޮތުގައި އޭނާ ޖޫރިމަނާ ކުރީ 750 ރުފިޔާއަށެވެ. 

އޭނާގެ ލައިސެންސް ހިފެހެއްޓި ވަގުތީ ގޮތުންނެވެ. ފުލުހުން ވަނީ މި ކަން ދަތުރުފަތުރު ވުޒާރާގެ ސަމާލުކަމަށް ގެނެސްފަ އެވެ. ދާއިމީ ފިޔަވަޅެއް ނިންމާނީ ވުޒާރާއިންނެވެ.

ދަތުރުފަތުރުގެ ވުޒާރާއިން ބުނީ އެ މައްސަލަ ބަލަމުންދާ ކަމަށެވެ. އަދި މައްސަލަ ބަލާފައި އަޅަން ޖެހޭ ފިޔަވަޅެއް އޮތްނަމަ އަޅާނެ ކަމަށް ވުޒާރާއިން ބުންޏެވެ. 

ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި އެމްބިއުލާންސް ބަރުގޮނު އަޅަމުން ދިޔަ އިރު ވެސް އެ ޕިކަޕް އެމްބިއުލާންސަށް ޖާގައެއް ނުދެ އެވެ. 

ޕިކަޕް އެ ތަނުން ދަނީ މުދާ ބަލާ ބުނުމުންނެވެ. 

ފުލުހުން ބުނީ މިފަދަ މައްސަލަތަކުގައި ވަގުތުން ޖޫރިމަނާކޮށް ވުޒާރާއަށް މައްސަލަ ފޮނުވާނެ ކަމަށެވެ.