ފުޅާ ދާއިރާއެއްގައި މަސްތުވާތަކެތީގެ ވިޔަފާރި ހިންގަމުން އަންނަ ފަރާތްތައް ހޯދުމަށް ޓަކައި ފުލުހުން "އަލިމަގު"ގެ ނަމުގައި ފެށި އޮޕަރޭޝަން ގއ. އަތޮޅަށް ފުޅާކުރާކަން ކުރިއާލާ ފުލުހުން އަންގައިފި އެވެ. 

ފުލުހުން ނެރުނު ބަޔާނެއްގައި ބުނީ އެ އޮޕަރޭޝަނަކީ ގއ. އަތޮޅުގައި ފުޅާ ދާއިރާއެއްގައި މަސްތުވާތެކީގެ ވިޔަފާރިކޮށް، އެ ވިޔަފާރިން ލިބޭ ފައިސާ ލޯންޑާ ކުރަމުންދާ ކަމަށް ތުހުމަތުކުރެވޭ ފަރާތްތަކަށް އަމާޒުކޮށްގެން ހިންގާ އޮޕަރޭޝަނެއް ކަމަށް ފުލުހުން ބުންޏެވެ.

"މި އޮޕަރޭޝަނުގެ ތެރެއިން، ތުހުމަތުކުރެވޭ ފަރާާތްތަކާއި ގުޅުންހުރި ތަންތަން ބަލައި ފާސްކުރުނެ" ފުލުހުން ބުނެފައިވެ އެވެ.

ފުލުހުން ބުނީ އެ އޮޕަރޭޝަނަކީ ސައުތު ޕޮލިސްގެ ހާއްސަ ޓީމުތަކާއި ފުލުހުންގެ މައި އިންޓެލިޖެންސް ޑިޕާޓްމަންޓު އަދި ޑްރަގު އެންފޯސްމަންޓު ގުޅިގެން ހިންގާ އޮޕަރޭޝަނެއް ކަމަށެވެ.

މިދިޔަ ނޮވެމްބަރު ގައި ފުލުހުން ހިންގި އޮޕަރޭޝަން އަލިމަގުގެ ފުރަތަމަ ބޮޑު އޮޕަރޭޝަނުގައި 29 ކިލޯގެ މަސްތުވާތަކެތި އަތުލައިގަނެ 110 މީހުން ހައްޔަރުކުރި އެވެ. އެ އޮޕަރޭޝަނުގައި 500 ފުލުހުން ބައިވެރިވި އެވެ. 

އެގޮތުން މީހުން ދިރިއުޅޭ 187 ރަށުގެ ތެރެއިން 39 ރަށުގައި މި އޮޕަރޭޝަން ހިންގި އެވެ. އަދި 105 ތަނެއް ބަލައިފާސްކޮށް ނުވަ އެއްގަމު އުޅަނދާއި ކަނޑު އުޅަނދެއް ބަލައިފާސްކުރި ކަމަށް ފުލުހުން މައުލޫމާތުދެ އެވެ.