އަލަށް ދުންފަތުގެ އިސްތިއުމާލު ކުރުމުގެ ތެރެއަށް ވަންނަ ޒުވާނުން ހުއްޓުވުމަށް ފިޔަވަޅުތައް އަޅާނެކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

ރައީސް ޑރ. މުއިއްޒު މިހެން ވިދާޅުވީ މިއަދު ފަށައިގެން ކުރިއަށްގެންދަމުން އަންނަ އެ މަނިކުފާނުގެ ޕޮޑްކާސްޓް "ރައްޔިތުންނާ އެކު"ގެ ފުރަތަމަ އެޕިސޯޑުގައި ވާހަކަފުޅު ދައްކަވަމުންނެވެ.

"ހާއްސަކޮށް ޒުވާން ކުދިން، އަލަށް ދުންފަތުގެ އިސްތިއުމާލު ކުރުމުގެ ތެރެއަށް ވަންނަ ކުދިން އެކަމުން ދުރުކުރުމަށް ފިޔަވަޅުތަކެއް އަޅާނަން" ރައީސް ވިދާޅުވިއެވެ. 

ރައީސް ހުށަހަޅުއްވާ އެއް ހިޔާލަކީ "ޖެނެރޭޝަން ބޭން" އެއް ގެނައުމެވެ. އޭގެ މާނައަކީ ވަކި އަހަރަކަށް ފަހު އުފަންވާ މީހުންނަށް ދުންފަތް ބޭނުންކުރުން މަނާކުރުމެވެ. އޭރަށް އަލަށް ދުންފަތުގެ އިސްތިއުމާލުކުރާ މީހުން މަދުކުރެވިދާނެ ކަމަށް ރައީސް ގަބޫލުފުޅު ކުރައްވައެވެ.

"ޖެނެރޭޝަން ބޭން ފިޔަވަޅުތަކަކީ ދުނިޔޭގެ އެކި ގައުމުތަކުގައި އަޅަމުންދާ، ދުންފަތުގެ އިސްތިއުމާލުކުރަން އަލަށް ވަންނަ ކުދިން އެކަމުން ދުރުކުރުމަށް އަޅާ ފިޔަވަޅުތަކެއް،" ރައީސް ވިދާޅުވި އެވެ.

ރައީސް ވިދާޅުވީ މި ފަހުން އެ މަނިކުފާނުގެ ސިޔާސަތުގެ ދަށުން ރާއްޖޭގައި ދުންފަތުގެ އިސްތިއުމާލު ކުރާ މީހުން އެކަމުން ދުރުކުރުމަށް ޓަކައި ވަރަށް ގިނަ ފިޔަވަޅުތަކެއް އަޅާފައިވާނެ ކަމަށެވެ. އަދި ރައްޔިތުން އެ ވަބާއިން ދުރުކުރުމަށް ފެށި މަސައްކަތަކީ ވަރަށް މާތް މަގްސަދެއްގައި އެ މަނިކުފާނު ފެއްޓެވި ކަމެއްކަމަށް ވިދާޅުވިއެވެ.

އިތުރަށް ރައީސް ވިދާޅުވީ ދުންފަތުގެ އިސްތިއުމާލުކުރުމާ ޒުވާނުން ދުރުކުރުމަކީ އެ މަނިކުފާނު ހާއްސަ އިސްކަމެެއް ދެއްވާ ކަމެއް ކަމަށެވެ.

ރާއްޖޭގައި މިހާރު ވޭޕް ބޭނުން ކުރުން ވަނީ މަނާކޮށްފަ އެވެ. ވޭޕާއި އީސިނގިރޭޓު މަނާކުރިއިރު ދުންފަތުން ނަގާ ޓެކްސް ވަނީ ބޮޑުކޮށްފަ އެވެ. ދުންފަތް ހެދުން ރާއްޖޭގައި މަނާކޮށް، ދުންފަތް ހެދުމަށް ޓަކައި ބޭނުންކުރާ ތަކެތި ވެސް އެތެރެނުކުރެވޭ ގޮތަށް ގާނޫނު ވަނީ ކުރިއަށް ވުރެ ބޮޑަށް ތަފުސީލު ވެސް ކޮށްފަ އެވެ.