އައްޑޫ ސިޓީގެ މޭޔަރުކަމުގެ ޓިކެޓަށް ވާދަކުރެއްވި އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަހުމަދު އަދީލު ނަސީރު ނަން ނެގުމުން ވާދަވެރި ކަމެއް ނެތި ޕީއެންސީގެ ޓިކެޓު މުޝްރިފް އަލީ އަށް ދީފި އެވެ.

އެނގިފައިވާ ގޮތުން އާދިލް ނަން ނެގީ، އަމިއްލަ އަށް ބޭނުންވެގެންނެވެ. އަދި އާދިލްގެ ނަން އަނބުރާ ގެންދިޔުމާއެކު ޕީއެންސީގެ ޓިކެޓުގައި ކައުންސިލްތަކުގެ އިންތިހާބުގައި އައްޑޫގެ މޭޔަރުކަމަށް ވާދަކުރުމުގެ ޓިކެޓު ދެން ހުންނެވި ކެންޑިޑޭޓް މުޝްރިފް އަލީ އަށް ވަނީ ލިބިފަ އެވެ. 

އަދީލް އޭނާގެ ފޭސްބުކްގައި ކުރެއްވި ޕޯސްޓެއްގައި މިއަދު ވިދާޅުވީ، އައްޑޫގެ ހާލަތު ބަދަލު ކުރުމަށްޓަކައި ޕީއެންސީގެ ތެރެއިން އެ ފުރުސަތު ހޯދުމަށްކުރި މަސައްކަތުން އެނގިވަޑައިގަތީ އެ ޕާޓީގެ އައްޑޫގެ މެންބަރުން ވެސް ތިބީ އެ ފުރުސަތު ދިނުމަށް ކެތްމަދުވެފައި ކަަމަށެވެ.

2023 ގެ ރިޔާސީ އިންތިހާބުގައި އެމްއެންޕީގެ ރިޔާސީ ކެންޑިޑޭޓް މުހައްމަދު ނާޒިމްގެ ރަނިންމޭޓެއްގެ ގޮތުގައި އާދިލް ކެމްޕެއިން ކުރައްވައިފަ އެވެ. ރައްޔިތުންގެ މަޖިލިހުގެ އިންތިހާބުގައި ހިތަދޫ ދެކުނު ދާއިރާ އަށް އާދިލް އަމިއްލަ ގޮތުން ވާދަކުރެއްވި އެވެ. އެކަމަކު، އެ ގޮނޑި ކާމިޔާބު ކުރެއްވީ އެމްޑީޕީގެ ކެންޑިޑޭޓް އިބްރާހިމް ނާޒިލް އެވެ.