ފާޑުކިޔުންތައް އަމާޒުވުމުން އަދަދު ނޫހުން ޝާއިއު ކުރި ސިޔާސީ ކާޓޫނު، އެއްވެސް ފަރާތަކުން ދައުރު ނުކުރުމަށް އެންގި އެންގުން ހަމަ އެކަނި ނޫސްތަކުން ދައުރު ނުކުރާ ގޮތަށް މީޑިޔާ ކޮމިޝަނުން ބަދަލު ގެނެސްފިއެވެ.

ނޫސްތަކުން ދައުރު ނުކުރުމަށް އަންގާފައިވަނީ މިދިޔަ ބުރާސްފަތި ދުވަހު ހެނދުނު 'އަދަދު' ނޫހުން ޖެހި ކާޓޫނެކެވެ. މި ކާޓޫނުގެ މައްސަލަ މީޑިޔާ ކޮމިޝަނުން އަންނަނީ ބަލަމުންނެވެ.

މި ސިޔާސީ ކާޓޫނުގެ މައްސަލަ އެ ކޮމިޝަނުން މައްސަލަ ބަލަމުން ދަނީ، އިސްލާމް ދީނުގެ އެންމެ މަތިވެރިވެގެންވާ އަޅުކަން ކަމަށްވާ ނަމާދުގެ ރުކުނެއް ކަމަށްވާ ސަޖިދަ، މަކަރާއި ހީލަތް ގުޅުވޭހެން ދޭހަވާ ގޮތަށް ޝާއިއުކޮށްފައިވާ ކަމަށް ތުހުމަތުކޮށެވެ.

މިކަމާ ގުޅިގެން އެ ކޮމިޝަނުން މިއަދު ފުރަތަމަ ނެރުނު އިއުލާނުގައި އަނގާފައިވަނީ އެއްވެސް ފަރާތަކުން އެ ޕޯސްޓް ދައުރު ނުކުރުމަށެވެ.

ފާޑު ކިޔުންތަކާއެކު އެ އިއުލާނު ޑިލީޓުކޮށް ހަމަ މިއަދު އާ އިއުލާނެއް ނެރެފައިވެއެވެ. ފަހުން ނެރުނު އިއުލާނުގައި ވަނީ އެއްވެސް މީޑިއާއަކުން އެ ޕޯސްޓް ދައުރު ނުކުރުމަށް އަންގާ ކަމަށެވެ. 

މީޑިޔާ ކޮމިޝަނުން ބަލަމުންދާ ސިޔާސީ ކާޓޫނުން ފެންނަނީ ބަޔަކު ނަމާދުގެ ޖަމާއަތުގައި ތިއްބައި، ރައީސް މުހައްމަދު މުއިއްޒުގެ ސިފަ ފެންނަ، ނޭފަތް ދިގު މިީހެއް އިމާމަށް ހުންނަ މީހާގެ ޖީބުން ފައިސާ ވަގަށް ނަގާ ތަނެވެ.