މަގާމުގެ ނުފޫޒު ފޯރުވައިގެން ބިދޭސީއަކު އަތުން 500,000 އެއްހާ ރުފިޔާ ފޭރުނު ކަމަށް ބުނާ މައްސަލާގައި ޝަރީއަތް ނިމެންދެން ބަންދުގައި ހުންނެވި އިމިގްރޭޝަންގެ ކުރީގެ ކޮންޓްރޯލާ ޝަމްއާން ވަހީދު މިއަދު ދޫކޮށްލައިފި އެވެ. 

ޝަމްއާން ބަންދުން ދޫކޮށްލަން މިއަދު އެދެނީ ދައުލަތުންނެވެ. ޝަމްއާން ކުރިން ބަންދުކުރީ ހެއްކަށް ނުފޫޒު ފޯރުވުމުގެ އިހުތިމާލު އޮވެގެނެވެ. މިހާރު މުހިންމު ގިނަ ހެކިންގެ ހެކި ބަސް ވަނީ ނަގައިފަ އެވެ. 

ބަންދުން ދޫކޮށްލި ނަމަވެސް އޭނާގެ ޕާސްޕޯޓް ހިފަހައްޓަން ދައުލަތުން އެދުނެވެ. ދައުލަތުން އެދުނު ގޮތަށް ކޯޓުން ވަނީ އޭނާގެ ޕާސްޕޯޓް ހިފެހެއްޓުމުގެ އަމުރު ވެސް ކޮށްފަ އެވެ. 

ޝަމްއާން ހައްޔަރުކުރަނީ މިދިޔަ މާޗު މަހުގެ 22 ވަނަ ދުވަހުގަ އެވެ. މިއަދަށް އޭނާ ބަންދުގައި ހުންނަވާތާ 9 މަހާއި ތިން ދުވަސް ވަނީ ވެފަ އެވެ. 

ޕްރޮސިކިއުޓާ ޖެނެރަލްގެ އޮފީހުން ބުނިގޮތުގައި، އިމިގްރޭޝަންގެ ރިސްކް ސެކްޝަނުން އިމިގްރޭޝަންގެ ބެލުމުގެ ދަށަށް ގެންދިޔަ ބިދޭސީ މީހަކު ދޫކޮށްލަން ޝަމްއާން އިރުޝާދު ދިނެވެ. އެ މީހާއާ އެކު އިމިގްރޭޝަންގެ ބެލުމުގެ ދަށަށް ގެންދިޔަ 500،000 ރުފިޔާ އަތުލުމަށް ވެސް ޝަމްއާން އަންގާފައިވެ އެވެ.

ޕީޖީ އޮފީހުން ބުނެފައިވަނީ އެ ފައިސާ ބިދޭސީ މީހާގެ އަތުން ނަގާފައިވަނީ އޭނާ ރާއްޖެ ދޫކޮށް ނުގޮސްފި ނަމަ ދަތިކުރުމަށް އިތުރު ފިޔަވަޅުތައް އަޅާނެ ކަމުގެ އިންޒާރު ދިނުމަށް ފަހު ކަމަށެވެ.