އައްޑޫ ސިޓީ ކައުންސިލްގެ ދަށުން އިދާރީ ގޮތުން މީދު އާއި ހުޅުދޫ އަދި ފޭދޫ ވަކިކުރުމާ މެދު އިއްޔެ ނެގި ރައްޔިތުންގެ ހިޔާލު ހޯދުމުގެ އާންމު ވޯޓުގައި އެންމެ ގިނަ އަދަދަކަށް ވޯޓުލީ ފޭދޫ ރައްޔިތުންކަން އިލެކްޝަން ކޮމިޝަން (އީސީ) ގެ ތަފާސް ހިސާބުތަކުން ދައްކައިފި އެވެ.

އީސީން ހިއްސާކޮށްފައިވާ ވަގުތީ ނަތިއްޖާ ދައްކާގޮތުން މީދޫގައި ވޯޓުލުމުގެ ހައްގު ލިބިގެންވާ 2347 މީހުން ތިބިއިރު ވޯޓުލީ 1008 މީހުންނެވެ. އެއީ ވޯޓުލެވޭ އިންސައްތައިގެ 42.95 ޕަސެންޓެވެ. ޖުމްލަ 847 ވޯޓާއެކު މީދޫ އިން ނިންމީ އައްޑޫ ސިޓީ ކައުންސިލުން ވަކިވާންށެވެ. އައްޑޫ ކައުންސިލު ވަކިވާން ނުފެންނަ ކަމަށް ވޯޓު ދިނީ 144 މީހުންނެވެ. 

ހުޅުދޫ ގައި ވޯޓުލުމުގެ ހައްގު ލިބިގެންވާ 2874 މީހުން ތިބިއިރު ވޯޓުލީ 1069 މީހުންނެވެ. އެއީ ވޯޓުލެވޭ އިންސައްތައިގެ 37.20 ޕަސެންޓެވެ. ޖުމްލަ 723 ވޯޓާއެކު ހުޅުދޫ އިންވެސް ނިންމީ އައްޑޫ ސިޓީ ކައުންސިލުން ވަކިވާންށެވެ. އައްޑޫ ކައުންސިލު ވަކިވާން ނުފެންނަ ކަމަށް ވޯޓު ދިނީ 329 މީހުންނެވެ.

ފޭދޫއަށް ބަލާއިރު އެ ރަށުގައި ވޯޓުލުމުގެ ހައްގު ލިބިގެންވާ 4355 މީހުން ތިބިއިރު ވޯޓުލީ 2436 މީހުންނެވެ. އެއީ ވޯޓުލެވޭ އިންސައްތައިގެ 55.94 ޕަސެންޓެވެ. ޖުމްލަ 1784 ވޯޓާއެކު ފޭދޫ އިން ނިންމީ އައްޑޫ ސިޓީ ކައުންސިލުގައި ދެމިތިބޭށެވެ. އައްޑޫ ކައުންސިލު ވަކިވާން ފެންނަ ކަމަށް ފޭދޫ އިން ވޯޓު ދިނީ 616 މީހުންނެވެ.