2013 ވަނަ އަހަރު ދިން ބެލޮންޑިއޯ އެވޯޑް ކްރިސްޓިއާނޯ ރޮނާލްޑޯއަށް ދިނުމަކީ ހިންގި ބޮޑު ޖަރީމާއެއްކަމަށް ފްރާންސްގެ ކުރީގެ ފުޓުބޯޅަ ތަރި ފްރޭންކް ރިބެރީ ބުނެފިއެވެ.

ރިބެރީ ބުނީ ފްރާންސްގެ 'ފްރާންސް ފުޓްބޯލް' މަޖައްލާ ދޭ ބެލޮންޑިއޯ އެވޯޑް 2013 ވަނަ އަހަރު ދިން ގޮތް ވިސްނަ ވިސްނައި ވެސް ނޭންގުނު ކަމަށެވެ.

އޭނާ ވަނީ ރޮނާލްޑޯއަށް އެ އެވޯޑް ދިނުމަށް ވޯޓް ދިނުމުގެ މުއްދަތު 2 ހަފުތާއަށް އިތުރުކުރިކަމަށް ވެސް ތުހުމަތުކޮށްފައެވެ.

2013 ވަނަ އަހަރުގެ ބެލޮންޑޯ އެވޯޑަށް ނޮމިނޭޓް ވެފައިވަނީ ރޮނާލްޑޯއާއި މެސީގެ އިތުރުން ރިބެރީއެވެ.

އެ އަހަރުގެ ވޯޓް ނިމިފައިވަނީ ވަރަށް ފަރަގު ހަނިކޮށްށެވެ. ރޮނާލްޑޯ 1365 ވޯޓު ހޯދިއިރު، ދެވަނައަށް ދިޔަ މެސީއަށް ލިބުނީ 1205 ވޯޓެވެ. އަދި ތިންވަނައަށް ދިޔަ ރިބެރީއަށް ލިބުނީ 1127 ވޯޓެވެ.

ބެލޮންޑޯ ވާދަކުރާ ކުޅުންތެރިން ހޮވުމަށް ވޯޓް ދެވޭ އެންމެ ފަހުގެ ތާރީހަކީ 2013 ވަނަ އަހަރުގެ ނޮވެމްބަރު މަހުގެ 15 ވަނަ ދުވަސް ކަމުގައި ކުރިން ހަމަޖައްސާފައި އޮތް ނަމަވެސް ވޯލްޑް ކަޕްގެ ޕްލޭއޮފްގައި ސްވިޑްން ކޮޅަށް ހެޓްރިކެއް ހަދައި ޕޯޗްގަލްއަށް 2014 ވަނަ އަހަރުގެ ވޯލްޑްކަޕުން ޖާގައެއް ރޮނާލްޑޯ ކަށަވަރު ކޮށްދިންތާ ގިނައިރުތަކެއް ނުވަނީސް ފީފާއިން ވަނީ އެ މުއްދަތު ނޮވެމްބަރު 29ގެ ނިޔަލަށް އިތުރު ކޮށްފައެވެ.

ސަބަބެއް ކަމަށް ފީފާއިން ބުނެފައިވަނީ، މުއްދަތު ހަމަވީ އިރު ވޯޓު ލާފައިވަނީ ވޯޓު ލުމުގެ ހައްގުލިބިދޭ 50 އިންސައްތައަށް ވުރެ މަދު މީހުން ކަމަށެވެ.

އެއަހަރު ރިބެރީ ވަނީ މޮޅު ކުޅުމެއް ދައްކައިފައެވެ. އޭނާ ވަނީ ބަޔާންއާއެކު އެ އަހަރު ޗެމްޕިއަންސް ލީގާއި، ލީގައި، ޖަރުމަން ލީގާއި ޖަރުމަން ކަޕާއި އަދި ޔުއެފާ ސުޕަ ކަޕް ކާމިޔާބުކޮށްފައެވެ.

އެ އަހަރުގެ އެވޯޑު ލިބުން އެންމެ ހައްގީ ރިބެރީއަށްކަމަށް ގިނަ ބަޔަކު އޭރު އިއްތިފާގުވިއެވެ.