މަޝްހޫރު ބޮޑުބެރު ގްރޫޕް 1438 ގްރޫޕުއާ ލަވަކިޔުންތެރިޔާ ޝަލަބީ އިބްރާހިމް އާއި މޯލްޑިވިއަން އައިޑޮލް އިން މަޝްހޫރުކަން ހޯދި އަބްދުﷲ ހިޝާން ގުޅިއްޖެ އެވެ. 

އެކަން ހާމަކޮށް 1438 އިން ފޭސްބުކް ގައި ކުރި ޕޯސްޓެއްގައި ބުނީ ޝަލަބީ އަދި ހިޝާން ފަދަ ހުނަރުވެރި ފަންނާނުން ގުޅުމަކީ ލިބުނު ބޮޑު ކުރިއެރުމެއް ކަމަށެވެ.

ހިޝާން އަށް މޯލްޑިވިއަން އައިޑޮލް އިން 5 ވަނަ ލިބުނުއިރު ޝަލަބީ އަކީ މޯލްޑިވިއަން އައިޑޮލްގެ ރަނަރަޕް އެވެ.  

އަދި ދެ ފަންނާނުންގެ ހުނަރާއެކު ބޮޑު ބެރު ގްރޫޕު އާއުސްމިންތަކަކަށް ގެންދެވޭނެ ކަމަށް ސާދަ ތިރީސް އަށަކުން ބުންޏެވެ. 

ސާދަ ތިރީސް އަށެއް ބޮޑުބެރު ގްރޫޕުގެ އަސްލަކީ ބޮޑުބެރަށް ލޯބިކުރާ ޒުވާން ކުދީން ކޮޅެއް އައި ބޮޑުބެރު ގްރޫޕެއް ރަޖިސްޓަރީކުރުމުގެ ހުވަފެންތަކާއެކު އުފެދިގެން އައި ހިޔާލެކެވެ. ސާދަ ތިރީސް އަށެއްގެ ހަޔާތުން ފާއިތުވި 9 އަހަރު ދުވަހުގެ ތެރޭގައި ވަނީ ރާއްޖޭގައި ގިނަ އަދަދެއްގެ ޝޯތައް ހުށަހަޅައިދީފައެވެ. އޭގެ ތެރޭގައި ރިސޯޓުތަކާއި ރަށްރަށާއި އެކިއެކި އިވެންޓުތައް ހިމެނެއެވެ. އެ ގްރޫޕުން ވަނީ ބޮޑުބެރު ޗެލެންޖު ޗެމްޕިއަންން އަދި ރާއްޖޭގެ އެންމެ އަވަކަށް އެއް މިލިއަން މޭޝް އަޕް ލިބުނު ގްރޫޕެވެ. 
 
ސާދަ ތިރީސް އަށެއް ގައި މިހާރު 55 މެންބަރުން ތިބިއިރު، އެ ގްރޫޕުގެ ސްޕޮންސަރުންގެ ގޮތުގައި ޝީޝާ، ދިރާގު ފަދަ ބޮޑެތި ކުންފުނިތައް ހިމެނެއެވެ. 

1438 ގެ މީޑިއާ ޕާޓްނަރަކީ ''ކުރިއަށް'' އެވެ.