ޕަބްޖީގައި ޕާކިސްތާނުގެ އެންމެ ވަރުގަދަ އެއް ޓީމު ކަމަށްވާ ދަ ރެޖިސައިޑްސް (އާރު3ޖިސައިޑްސް)، ރާއްޖޭގެ އީސްޕޯޓްސް އޯގަނައިޒޭޝަނެއް ކަމަށްވާ ލޯޔަލްޓީ ފަސްޓް އީސްޕޯޓްސް (އެލްއެފް އީސްޕޯޓްސް) އަށް ސޮއިކޮށްފި އެވެ.

ދަ ރެޖިސައިޑްސް އަކީ ސަރަހައްދީ އެންމެ މަތީ ފަންތީގެ މުބާރާތްތައް ކަމަށްވާ ޕަބްޖީ މޮބައިލް ސުޕަ ލީގު (ޕީއެމްއެސްއެލް) ސެންޓްރަލް އެންޑް ސައުތު އޭޝިއާގައި ވާދަކޮށްފައިވާ ޓީމެކެވެ. އަދި އެ ޓީމަކީ ޕީއެމްއެންސީ ޕާކިސްތާން ސްޕްރިންގް 2025ގެ ރަނަރަޕް ޓީމެވެ.

އެލްއެފް އީސްޕޯޓްސްއިން ބުނި ގޮތުގައި މިއީ ދިވެހި އީސްޕޯޓްސް އޯގަނައިޒޭޝަނަކުން ބައިނަލްއަގުވާމީ ވާދަވެރި ގޭމިންގެ ދާއިރާގައި މިހާތަނަށް އެޅި އެންމެ ބޮޑު ތާރީހީ ފިޔަވަޅެވެ.

އެއްބަސްވުމުގެ ދަށުން ރެޖިސައިޑްސްގެ މުޅި އޯގަނައިޒޭޝަން އެލްއެފް ސްޕޯޓްސްގެ ދަށުން ހިންގަމުންދާއިރު އެލްއެފް ސްޕޯޓްސްއިން ސިފަކުރާ ގޮތުގައި މިއީ ބައިނަލްއަގުވާމީ އީސްޕޯޓްސް މައިދާނުގައި ރާއްޖެއަށް ލިބުނު ބޮޑު ކާމިޔާބީއެކެވެ.

"ޕަބްޖީ މޯބައިލް ރޯސްޓާ 2026"ގެ ނަމުގައި ނެރުނު ވީޑިއޯއަކަށްފަހު އެލްއެފްއެ ޓީމުގެ ކުޅުންތެރިން  އީސްޕޯޓްސްއިން ވަނީ ތައާރަފުކޮށްފައިވާއިރު އެ ޓީމުގައި ހިމެނޭ 5 ކުޅުންތެރިންނަކީ ޝާކާއާއި ސީނިއާއާއި ޕިންކްމޭންގެ އިތުރުން ރޮޝާން، އަދި ވާޒް އެވެ.