މެދުއިރުމަތީގެ މަސްރަހު ނުތަނަވަސްވެ ފްލައިޓްތަކަށް ވައިގެ ދަތުރުފަތުރުތައް އައި ބަދަލުގެ ސަބަބުން ކެންސަލްވި ފުލައިޓުތަކުން ނުފުރި 1،400 ފަތުރުވެރިން އެބަތިބި ކަމަށް، ޓޫރިޒަމް މިނިސްޓަރު ތާރިގް އިބްރާހީމް ރޭ ވިދާޅުވެއްޖެ އެވެ.

ރޭ ވީއައިއޭގައި ނޫސްވެރިންނާ ބައްދަލުކުރައްވައި މިނިސްޓަރު ވިދާޅުވީ ފުލައިޓުތައް ކެންސަލްވުމުގެ ސަބަބުން  އެއާޕޯޓުގައި ތާށިވެފައި ތިބި ފަތުރުވެރިންގެ ތެރެއިން ބައެއް ފަތުރުވެރިން އެދުނީ އެ މީހުން ކުރިން ތިބި ގެސްޓްހައުސްތަކަށާއި ރިސޯޓުތަކަށް ދެވޭނެ ގޮތް ހަމަޖައްސައިދިނުމަށް ކަމަށެވެ.

އަދި އެހެން ފުލައިޓެއްގައި ދެވޭނެ ގޮތް ފަހިކޮށްދޭން ބައެއް އެހެނިހެން ފަތުރުވެރިން އެދިފައިވާ ކަމަށް މިނިސްޓަރު ވިދާޅުވި އެވެ. އެއާޕޯޓުގައި ތިބެވޭނެ އިންތިޒާމު ހަމަޖައްސައިދޭން ވެސް އިތުރު ފަތުރުވެރިންތަކެއް އެދުނު ކަމަށްވެސް ވިދާޅުވި އެވެ.

މިނިސްޓަރު ވިދާޅުވީ، މެދުއިރުމަތީގެ ހަނގުރާމައިގެ ހާލަތުގެ ސަބަބުން އަށް ފުލައިޓެއް ކެންސަލްވެ އޭގެ ތެރެއިން ދެ ފުލައިޓެއް ނުފުރި އެބައޮތް ކަމަށެވެ. މި ވަގުތު އެއާޕޯޓުގައި ތިބި ފަތުރުވެރިންނަށް، ކުރީގެ ޑޮމެސްޓިކް ޓާމިނަލުގެ ތެރޭ ތިބެވޭނެ އިންތިޒާމު ގޮނޑިއާއި އިންޓަނެޓާ ހަމަޖައްސާދީފައިވެ އެވެ.

އަދި ފަތުރުވެރިންނަށް އިތުރު މައުލޫމާތުދީ، އެ މީހުން ބޭނުންވާ އެހީތެރިކަން ދިނުމަށްޓަކައި ވިޒިޓް މޯލްޑިވްސް ކޯޕަރޭޝަނާ ގުޅިގެން ހެލްޕްޑެސްކެއް ގާއިމްކޮށްފައިވެ އެވެ. 

ޓޫރިޒަމް މިިނިސްޓްރީން ވަނީ މެދުއިރުމަތީގެ ހަނގުރާމައިގެ ހާލަތުގެ ސަބަބުން ވައިގެ ދަތުރުފަތުރަށް ބުރޫއަރައި، ފުލައިޓުތައް ދަތުރުކުރާ ވަގުތަށް ބަދަލު އައިސްފައިވާތީ އެ ބަދަލުތައް ކަށަވަރުކުރުމަށް ރިސޯޓުތަކަށާއި، ފަތުރުވެރިކަމުގެ ހިދުމަތްދޭ ތަންތަނަށް އިލްތިމާސްކޮށްފައެވެ.