ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލައަށް ދާއިމީ ހައްލެއް ގެނައުމަށް މޭ މަހު ފެށި "އޮޕަރޭޝަން ކުރަނގި" ހަރަކާތުގެ ދަށުން މިހާތަނަށް ލައްކައަކަށްވުރެ ގިނަ ބިދޭސީންގެ ބަޔޯމެޓްރިކް ޑޭޓާ އެއްކުރެވިފައިވާކަަމަށް ދާހިލީ ވުޒާރާއިން މިއަދު ބުނެފި އެވެ. 

ދާހިލީ ވުޒާރާއިން ބުނީ، މި އޮޕަރޭޝަން ހިންގަމުން އަންނަތާ 10 މަސް ދުވަސް ފާއިތުވެފައިވާއިރު، މިހާތަނަށް ލައްކައަަކަށްވުރެ ގިނަ ބިދޭސީންގެ މައުލޫމާތު އެއްކުރެވިފައިވާކަމަށެވެ.

މީގެ ތެރެއިން 65،000 ބިދޭސީންގެ މައުލޫމާތު އެއްކޮށްފައި ވަނީ މާލެ ސަރަހައްދުން ކަމަށް އެ ވުޒާރާއިން ބުންޏެވެ.. 

އޮޕަރޭޝަންގެ ފުރަތަމަ މަރުހަލާގެ ބޭނުމަކީ ރާއްޖޭގައި ތިބި ހުރިހާ ބިދޭސީންނަކީވެސް ގަވާއިދުގެ ތެރޭގައި މަސައްކަތް ކުރާ ބަޔަކަށް ހެދުމެވެ. މި އޮޕަރޭޝަނުގެ ދަށުން ގަވައިދާ ހިލާފަށް އުޅޭ ބިދޭސީންތައް ހޯދައި އެމީހުންގެ އިނގިލީގެ ނިޝާން ހޯދައި، ފޮޓޯ ނަގައި ނިޒާމުގެ ތެރެއަށް ވައްދާނެ އެވެ.

ބިދޭސީންގެ މައްސަލަ ބޮއްސުންލައިގެން ގޮސްފައި ވަނީ ފާއިތުވި ސަރުކާރުތަކުގެ އިހުމާލުން ކަމަށާއި، މިހާރު ކުރިއަށް ގެންދާ އޮޕަރޭޝަން ކުރަނގި ނިންމާލެވޭ އިރު، ގަވާއިދާ ހިލާފަށް އުޅޭ ބިދޭސީންގެ މައްސަލައަށް ބޮޑު ހައްލެއް ލިބިގެންދާނެ ކަމަށް ވުޒާރާއިން ބުންޏެވެ.

މާލޭ ސަރަހައްދުގައި އޮޕަރޭޝަން ކުރަނގީގެ ހަރަކާތްތައް ހިންގުމަށް މިހާރު ވަނީ ހާއްސަ މަރުކަޒުތަކެއް ގާއިމް ވެސް ކޮށްފަ އެވެ. އެއީ އެންމެ ފުރަތަމަ ހަރަކާތްތައް ހިންގަން ކަނޑައެޅި ޖޮއިންޓް އޮޕަރޭޝަން ސެންޓަރާއި ނޯތު ހާބަރު ސަރަހައްދުގެ ޑެސްކްގެ އިތުރުން، ކަލާފާނު ސްކޫލުގަޔާއި ހުޅުމާޅެ ރެހެންދި ސްކޫލުގައި ގާއިމްކުރި މަރުކަޒުތަކެވެ.

ދާހިލީ ވުޒާރާއިން ވަނީ ބަޔޯމެޓްރިކް އެއްކުރުމުގެ ހަރަކާތް ރިސޯޓުތަކުގައި ވެސް ކުރިއަށް ގެންގޮސްފަ އެވެ.