ކުޑަކުދިންނަށް ޖިންސީ ގޯނާކުރުމާއި ކުޑަކުދިންގެ ބަރަހަނާ މަންޒަރު ވީޑިއޯކޮށް، އެ ކުދިންނާއި އެތައް ބަޔަކު ބްލެކްމެއިލްކުރި ޖެފްރީ އެޕްސްޓީންއާ އެކު، ކުރީގެ ރައީސް ޑރ. މުހައްމަދު ވަހީދު ގުޅުން ބޭއްވި ގުޅުމުގެ މައްސަލަ ފެންމަތިވެ ފާޑުކިޔުން އަމާޒުވުމުން އެމަނިކުފާނު ވަނީ ރައީސް ޑރ. މުހައްމަދު މުއިއްޒުގެ އެޑްވައިޒަރުގެ މަގާމުން ވަނީ އިސްތިއުފާދެއްވާފައެވެ. 

ވަހީދުގެ އޮފީހުން އިއްޔެ ނެރުނު ބަޔާނުގައި ބުނެފައިވާ ގޮތުން ވަހީދު އެޕްސްޓީން އާ ބައްދަލުކުރީ ދެ ފަހަރެއްގެ މަތިންނެވެ. އެއީ 2012 ވަނަ އަހަރުގެ ސެޕްޓެމްބަރު މަހު އާއި އަދި މޭ 2014 ގައި އެމެރިކާގެ ނިއުޔޯކުގައި ހުންނަ އެޕްސްޓީންގެ ގޭގަ އެވެ.

އެކަމަކު އެމެރިކާގެ ޖަސްޓިސް ޑިޕާޓްމަންޓުން އެޕްސްޓީންގެ ތަހުގީގާ ގުޅޭ ގޮތުން އާއްމުކޮށްފައިވާ ލިޔެކިޔުންތަކުން ވެސް ދެ ފަހަރަށްވުރެ ގިނައިން ވަހީދު އެޕްސްޓީން އާ ބައްދަލުކުރިކަން ހާމަވެފައިވެ އެވެ.

އެގޮތުން ވަހީދު ވެރިކަމަށް ވަޑައިގަތުމުގެ ކުރިން 2011 ވަނަ އަހަރު އެމެރިކާއަށް ކުރެއްވި ދަތުރެއްގައި އެޕްސްޓީންގެ ގޭގައި އޭނާ އާ ބައްދަލުކުރި އެވެ. ޖަސްޓިސް ޑިޕާޓްމެންޓުން ހާމަކޮށްފައިވާ މައުލޫމާތުތަކުގައިވާ ގޮތުން ވަހީދު، އެޕްސްޓީންއާ ބައްދަލުކުރީ 2011 ވަނަ އަހަރުގެ ސެޕްޓެމްބަރު މަހުގެ 21 ވަނަ ދުވަހު  އެޕްސްޓީންގެ ގޭގަ އެވެ. 

އަދި ވެރިކަމަށް ވަޑައިގަތުމުގެ ކުރިން  ޕެރިހުގައި ހުންނަ އެޕްސްޓީންގެ އެޕާޓްމަންޓުގައި ވަހީދު، އެޕްސްޓީންއާ ބައްދަލު ކުރިކަން އެނގެ އެވެ. އެކަމަކު އެއީ ކޮން ތާރީހެއްގައި ކަމެއް ލިޔެކިޔުންތަކުން އެނގޭކަށް ނެތެވެ. އެކަން ހާމަވަނީ ކުރީގެ ރައީސް މުހައްމަދު ނަޝީދުގެ ވެރިކަން ވެއްޓުނު ދުވަހު އެޕްސްޓީން، ވަހީދަށް ކޮށްފައިވާ މެސެޖުތަކުންނެވެ. 

"ރާއްޖޭގެ ކަންކަން ތި ބޭފުޅާގެ ބެލުމުގެ ދަށަށް އައުމަކީ އަޅުގަނޑަށް ލިބޭ ވަރަށް ބޮޑު އުފަލެއް،" 2012 ވަނަ އަހަރުގެ ފެބްރުއަރީ މަހުގެ 7 ވަނަ ދުވަހު އެޕްސްޓީން ވަހީދަށް ކުރި މެސެޖެއްގައި ބުންޏެވެ. ވަހީދަށް އެ މެސެޖް ކޮށްފައިވަނީ ޑީޕީ ވޯލްޑުގެ ޗެއާމަން އަދި ސީއީއޯ ސުލްތާން ބިން ސުލަޔެމްގެ އެދުމުގެ މަތިންނެވެ. އެ މެއިލުން އެނގޭ ގޮތުން އެ ތިން މީހުން ޕެރިހުގައި ބައްދަލުވި އެވެ. އަދި ރާއްޖެ އައުމަށް އެޕްސްޓީން އަށް ވަހީދު ދައުވަތު ދިން ކަމަށް ވެސް ބުނެފަ އެވެ.

ހާމަކޮށްފައިވާ މައުލޫމާތުތަކުން އެނގޭ ގޮތުން އޭގެ ފަހުންވެސް ވަހީދު، އެޕްސްޓީންއާ ބައްދަލުކޮށްފައިވުން އެކަށީގެންވެ އެވެ. އެކަމަކު އެ މިހާތަނަށް އިތުރު ބައްދަލުވުންތަކުގެ ތަފުސީލެއް ކަށަވަރުކުރެވިފައެއް ނުވެ އެވެ.

ވަހީދުގެ އޮފީހުން ނެރުނު ބަޔާނުގައި އެޕްސްޓީންއާއެކު ބޭއްވުނު ގުޅުމަށް ހިތާމަ ކުރައްވާ ކަމަށް ބުނެފައިވާއިރު، އެޕްސްޓީން އަކީ ރަނގަޅަށްވެސް ކާކުކަން ވަހީދަށް އެނގިވަޑައިގަންނަވާނެ އެވެ. އެޕްސްޓީންގެ މައްސަލަ އެންމެ ފުރަތަމަ ފެންމަތިވީ 2008 ވަނަ އަހަރު އެވެ.