ދުނިޔޭގެ ބާޒާރުގައި ތެލުގެ އަގު ބޮޑުވެއްޖެ އެވެ. ރާއްޖޭގައި ވެސް ބޮޑުކޮށްފި އެވެ. ޕެޓްރޯލްގެ އަގު ވެސް 30 ޕަސެންޓް ބޮޑުކޮށްލައިފި އެވެ. ހިނގާބިނގާވެ އުޅުމާއި ޕަބްލިކް ޓްރާންސްޕޯޓަށް ވަކާލާތުކުރާ މީހުންގެ ހިޔާލުތައް އަނެއްކާ ވެސް ދަނީ ސޯޝަލް މީޑިއާގައި ފާޅުކުރަމުންނެވެ. 

މިހެން ހުއްޓައި ފުރަތަމަ ވީ ގޮތަކީ ވެހިކަލް މަދު ވިލިމާލޭގައި ވެރިކަންކުރާ ޕީއެންސީ އިން ސައިކަލު ބުދެއް ބޭއްވީ އެވެ. ދެން ގައުމިއްޔަތު ވުޒާރާއިން ގައުމިއްޔަތު ދިރުވަން ސައިކަލު ބުރެއް ރޭވީ އެވެ. އަނެއް ކޮޅުން މިއަދު ހަވީރު އިދިކޮޅު އެމްޑީޕީން ވެސް ސައިކަލު ބުރެއް ގެންދަން ވަނީ ހަމަޖެހިފަ އެވެ. 

ޕަބްލިކް ޓްރާންސްޕޯޓް ނިޒާމު ފުޅާކޮށް މާލެއާއި ރަށްރަށުގެ ތޮއްޖެހުން ކުޑަކުރަން ވަކާލާތުކުރާ މީހުން މި ފަހަރު މާ ބޮޑަށް ރުޅިގަދަވެއްޖެ އެވެ. 

"ކަލޭމެން އެކަކު ވެސް ދެފައިގަ ވަރު ނެތީތަ؟ ހިނގަން ދަސްނުކޮށްތަ ބޮޑުވީ؟ ތެޔޮ ލިބުން ދަތިވެ، ތެލުގެ އަގު އުފުލެމުން ދާއިރު މިއީ ބޭކާރު ސައިކަލު ބުރު ޖަހަންވީ ވަގުތު ނޫން ކަން ވިސްނޭ ވަރުގެ ތެތްކަމެއް ސިކުނޑީގައި ހުރި އެކަކު ވެސް ކަލޭމެން ތެރޭ ނެތީތަ؟" އައިމަން ލަތީފް (ޕިކޯ) އެކްސްގައި ލިޔެފައިވެ އެވެ. 

މި ދަނޑިވަޅުގައި ވިލިމާލޭގައި ސައިކަލު ބުރެއް ޖެހުމުން ވެސް މި މީހުނަށް ކަމަކު ނުދިޔަ އެވެ. ވިލިމާލޭގައި ބޭނުންކުރަނީ ބެޓެރީ ސައިކަލު ކަމަށް ވިއަސް ވިލިމާލެ ތޮއްޖެހޭނެ ގޮތަކަށް ކެމްޕެއިން ހަރަކާތެއް ގެންގޮސް ނުވާނެ ނޫން ހެއްޔެވެ؟

"ވިލިމާލޭގައި ދިރިއުޅޭ މީހުން ދިރިއުޅެނީ ވެސް އަދި އެ ތަނަށް ދާ މީހުން ދަނީ ވެސް ތިމާވެއްޓާ ރައްޓެހި ހިމޭން ހިތްފަސޭހަ ތަނަކަށް އެ ތަން ވާތީ. މީހުން ގަބޫލުކުރާ ހަމައަކަށް އިހުތިރާމު ނުކުރެވޭ ބަޔަކު މީހުން ތަމްސީލްކުރާނީ ކިހިނެއް؟" މީހަކު އެކްސްގައި ލިޔެފައިވެ އެވެ. 

ތެދެކެވެ. ސަރުކާރު ވެސް، އިދިކޮޅު ވެސް މި ފެންނަނީ ސިޔާސަތުތަކާއި ކެމްޕެއިން އުކުޅުތަކުގައި އެއްވެސް އޮއްޓަރެއް ނެތި އެވެ.