އިޒްރޭލު-އެމެރިކާ ގުޅިގެން އީރާން އަށް ހަމަލާދޭން ފަށައި، އޭގެ ރައްދުގައި އީރާނުން ރައްދުގައި ގަލްފުގައި ތިބި އެމެރިކާގެ މަރުކަޒުތަކަށް ހަމަލާދިނުމާއި ގުޅިގެން ރާއްޖެއިން ނުފުރި ގިނަ އަދަދެއްެ ފަތުރުވެރިން ތާށިވެފައި އެބަތިބި އެވެ. ޓޫރިޒަމް މިނިސްޓަރު ތޯރިގު އިބްރާހިމް ވިދާޅުވެފައިވާ ގޮތުން ތާށިވެފައި ތިބި ފަތުރުވެރިންގެ އަދަދު 1400 އަށްވުރެ ގިނަ އެވެ. އެ މީހުންގެ ކަންކަން ހަމަޖެއްސުމަށް މަސައްކަތް ކުރަމުންދާ ކަމަށް ސަރުކާރުން ވަނީ ބުނެފަ އެވެ. 

އެކަމަކު ރާއްޖޭގައި ތާށިވެ، ނުފުރި ތިބި މީހުން ވަނީ އެ މީހުންނާ މެދު އަޅާނުލާ ކަމަށް ބުނެ ޝަކުވާތައް ކޮށްފަ އެވެ. އިނގިރޭސި ބަހުން ގެނެސްދޭ އިޓަލީގެ ނޫހަކަށް ދިން އިންޓަވިއުއެއްގައި ރާއްޖޭގައި ހުރި އެ ގައުމުގެ ފަތުރުވެރިއަކު ބުނީ ރާއްޖެއިން ނުފުރި 200 އެއްހާ މީހުން އެބަތިބި އެވެ. 

އަހަަރުމެން މިތަނަށް (އެއާޕޯޓް) އަށް ތިބީ ދޫކޮށްލާފައި، އަޅާލާނެ މީހެއް ނެތް.، އަހަންނަނީ ހަކުރު ބަލީގެ ބަލިމީހެއް، ބޭސް ވެސް ހުސްވާން ކައިރިވެއްޖެ، އަދި ވަގުތު ނުލިބިއްޖެ ނަމަ ހަދާނެ ގޮތެއް ވެސް ނޭނގޭ،" އެ ފަތުރުވެރިޔާ ބުންޏެވެ. 

އެއާޕޯޓުގައި ހުރި އިތުރު ފަތުރުވެރިއަކު ބުނީ އެންމެ ބޮޑު އެއް ކަންބޮޑުވުމަކީ ދެން ކަންކަން ކުރަންޖެހޭ ގޮތް އެއްވެސް މީހަކު ކިޔައިނުދޭތީވެ ކަމަށެވެ.

ބަލްގޭރިޔާ ނޫހަކުން ރިޕޯޓްކޮށްފައިވާ ގޮތުގައި އެ ގައުމުގެ 100 އަށްވުރެ ގިނަ މީހުން ވީއައިއޭގައި ތާށިވެފައި އެބަތިބި އެވެ. 

''އެއްވެސް މީހަކު އަހަރުމެންނަށް އެހީއެއް ނުވޭ. އަހަންނަށް ނޭނގޭ ދެން ކަންކަން ކުރަންވީ ގޮތެއް،" ބަލްގޭރިޔާ ސިލްވިއާ ނެޑެލްޗެވާ އެ ނޫހަށް ބުންޏެވެ. އޭނާ ބުނީ އެއާލައިނުގެ ހަރަދުގައި އެ މީހުންގެ ކަންކަން ހަމަޖައްސަން ދެކޮޅު ހަދާފައިވާ ކަމަށެވެ. 

އެ މީހުންގެވެސް އެންމެ ބޮޑު ކަންބޮޑުވުމަކީ އެހީވެދޭނެ ބަޔަކު ނެތުމެވެ. އެތައް ސަތޭކަ ބަޔަކު އެނބުރި ގައުމަށް ނުގޮސް އުޅެ އެވެ.