އާއިލީ ހިދުމަތްތަކުގެ ވުޒާރާއިން، ލަވަކިޔުންތެރިޔާ މަރިޔަމް މައީޝާ (ރާޅު މަރިޔަނބު)ގެ ދައްތައަށް ގުޅައި އެންގީ މައީޝާގެ ދަރިއެއް ހަވާލުކުރުމަށެވެ.

އެކަމަކު އެނގޭ ހެއްޔެޗެ؟ މައީޝާ ބުނާ ގޮތުން އޭނާގެ ދަރިއެއް ނެތެވެ. އޭނާ ދަރިއަކު ހުރި ވާހަކަ އިވިފައި އޭނާއަށް ލިބުނީ ޝޮކެކެވެ. 

އެ ހާދިސާ ސޯޝަލް މީޑިއާގައި ހިއްސާ ކުރަމުން މައީޝާ ބުނީ މިނިސްޓްރީން އޭނާއަށް ނުގުޅާތީ ވަރަށް ބޮޑަށް ކަންބޮޑުވާ ކަމަށެވެ. މިނިސްޓްރީން ކޮންމެ ފަހަރަކު ވެސް ގުޅަނީ މައީޝާގެ ދައްތައަށް ކަމަށެވެ.

ދެން އެ ވަރުން ވީއެއް ނޫނެވެ. މައީޝާގެ ގެ ބަލައިފާސްކުރަން ވެސް މިނިސްޓްރީގެ އޮފިޝަލުންތަކެއް ދިޔަ ކަމަށް އޭނާ ލިޔެފައިވެ އެވެ.

އަދި އޭގެ ފަހުން ވެސް ވަރަށް ގިނަ ކަންކަން ހިނގާފައިވާ ކަމަށް މައީޝާ ބުންޏެވެ. ނަމަވެސް ފަހުން އިތުރު ތަފުސީލެއް އަދި އަދާހަމައެއް ވެސް ދީފައެއް ނުވެ އެވެ.

ވުޒާރާއިން ބުނަނީ މައީޝާގެ ދެ އަހަރުގެ ދަރިއަކު ހުންނަ ކަމަށް އޭނާ ލިޔެފައިވެ އެވެ. އަދި އެ ދަރިއަށް މައީޝާ ދަނީ އިހުމާލުވާ ކަމަށް ތުހުމަތުކޮށްފައިވާ ކަމަށެވެ.

މި ކަމާ ގުޅިގެން އާއިލީ ހިދުމަތްތަކުގެ ވުޒާރާ އިން އަދި އެއްވެސް އެއްޗެއް ނުބުނެ އެވެ. އެހެންވެ ހިނގައިގެން އުޅޭ ކަންތައް މުޅިން ސާފެއް ވެސް ނުވެ އެވެ.