މިދިޔަ ހަފުތާ ފެށިގެން ސޯޝަލް މީޑިއާގައި އެންމެ ހިނގި މަންޒަރަކީ ހދ. ވައިކަރަދޫގެ ފަރު ހިކި، އުފެދިފައިވާ ނަލަ ޗާލު މުރަކަ ބަގީޗާ އެވެ. ހަފުތާ ނިމުނު އިރު މުރަކަ ބަގީޗާތަކުގެ ވީޑިއޯތައް އަދިވެސް އެބަ ހިނގަ އެވެ. 

ފަރު ހިކޭ މި މޫސުމުގައި މުރަކަ ބަގީޗާ ފެނިގެން މި އުޅެނީ ވައިކަރަދޫގައި އެކަންޏެއް ނޫނެވެ. ވައިކަރަދޫގެ އިތުރުން ވެސް އުތުރުގެ ބައެއް ރަށްރަށުގެ މުރަކަ ބަގީޗާގެ ވީޑިއޯތައް އެބަ ހިނގަ އެވެ. 

ދެން އެންމެ އަޅައިގަތީ ނ. މަނަދޫ އެވެ. މަނަދޫގެ މުރަކަ ބަގީޗާގެ ވީޑިއޯ ދޫކޮށްލީ ޑައިވަރެއް ކަމަށްވާ ހަމީދެވެ. އޭނާ ވަނީ އިންސްޓަގްރާމް އާއި ޓިކްޓޮކްއަށް ވެސް އޭގެ ވީޑިއޯތަކެއް ދޫކޮށްލައިފަ އެވެ. 

މަނަދޫގެ މުރަކަ ބަގީޗާގެ ވީޑިއޯތައް ހިނގާތާ ދެ ދުވަހެއް ވަރު ފަހުން ށ. ފުނަދުއަށް އުފަން ފޮޓޯގްރާފަރު ތަންނި ވަނީ ފޭސްބުކް އަދި އިންސްޓަގްރާމަށް އެ ރަށުގެ ފަޅުތެރޭ ހެދިފައިވާ މުރަކަ ބަގީޗާގެ ފޮޓޯތަކެއް ޕޯސްޓްކޮށްފަ އެވެ. 

އަދިވެސް ބައެއް ރަށްރަށުގެ މުރަކަ ބަގީޗާގެ ވީޑިއޯ އާއި ފޮޓޯތައް ފެންނާނެހެން ހީވެ އެވެ. މި އޮތީ މޫދު މަތިން މުރަކަ ބަގީޗާ ބަލާލެވޭ މޫސުމެއް ރާއްޖެ އައިސްގެނެވެ. މިއިން ރަށަކަށް ދާން ވެސް ބަޔަކު އުޅެފާނެ އެވެ. ގޮސްލުން ގޯހެއް ވެސް ނޫނެވެ.