މުންބާއީގައި ބޭއްވުނު އޭޝިއާގެ އެންމެ ފާހަގަކޮށްލެވޭ މިއުޒިކް މުބާރާތްތަކުގެ ތެރެއިން އެއް މުބާރާތް ކަމުގައިވާ ބެޓަލް އޮފް ދަ ބޭންޑްސް އިންޓަނޭޝަނަލް 2025 ގައި ދިވެހިރާއްޖޭގެ ބޭންޑް "ޓޫ އޮފް އަސް" އިން ތިންވަނަ ހޯދުން ފާހަގަކުރުމުގެ ގޮތުން ބާއްވާ ޝޯގެ އެންމެ އަގު ބޮޑު ޓިކެޓުތައް ވިއްކައި ހުސްވެއްޖެ އެވެ.

ޓިކެޓު ވިއްކަމުން ދަނީ އޮންލައިންކޮށެވެ.

ޓިކެޓު ވިއްކަމުން ދަނީ ތިން ކެޓަގަރީއަކުންނެވެ. އެއިން "ޕްލެޓިނަމް ޓިކެޓް" ކެޓަގަރީއަށް ހަމަޖެއްސި ހުރިހާ ޓިކެޓެއް މިހާރު ވިކި ހުސްވެފައިވާ ކަމަށް އެ ބޭންޑުން ބުންޏެވެ. އެންމެ އަގު ބޮޑު ކެޓަގަރީގެ ގޮތުގައި ހިމެނޭ މި ކެޓަގަރީގައި ހިމެނެނީ ޖުމުލަ 175 ޓިކެޓެވެ.

މިހާތަނަށް ޖުމުލަ ޓިކެޓުގެ ދެބައިކުޅައެއްބައި ވިކިފައިވާ ކަމަށް ވެސް ބޭންޑުން މައުލޫމާތު ދިނެވެ.

ގިނަ މީހުންގެ އެދުމުގެ މަތިން ޓިކެޓުތަކުގެ އަގު ވަނީ ކުޑަކޮށްފަ އެވެ. ޓިކެޓުތަކުގެ އަގު ކުޑަކުރި ނަމަވެސް ލަކީ ޑްރޯއަށް ހަމަޖައްސާފައިވާ ފައިސާގެ އިނާމުގެ އަދަދު އަދި ދޭން ކަނޑައަޅާފައިވާ ހިދުމަތްތަކަށް ބަދަލެއް ގެނެސްފައެއް ނުވެ އެވެ.

• ޕްލެޓިނަމް: ޓިކެޓުގެ އަގަކީ 1000 ރުފިޔާ، ނަސީބުވެރި ފަރާތަށް ދެނީ 10،000 ރުފިޔާ
• ގޯލްޑް: 500 ރުފިޔާ، ނަސީބުވެރި ފަރާތަށް ދެނީ 5،000 ރުފިޔާ
• ބްރޯންޒް: 250 ރުފިޔާ، ނަސީބުވެރި ފަރާތަށް ދެނީ 2،000 ރުފިޔާ

ޕްލެޓިނަމް ޓިކެޓު ގަންނަ ފަރާތްތަކަށް ލިބޭ ހިދުމަތްތަކުގެ ތެރޭގައި، ވީއައިޕީ ސީޓިން، ސްވެނިއާ، ސްނެކްސްގެ އިތުރުން ޝޯއަށް ފަހު ރޭގަނޑުގެ ކެއުމެއް ލިބެ އެވެ. ބޭންޑުގެ ފަންނާނުންނާއި ޝޯގައި ބައިވެރިވާ ބޭރުގެ ފަންނާނުންނާ ވެސް ބައްދަލުކޮށް ވާހަކަ ދެއްކުމުގެ ފުރުސަތު ލިބެެއެވެ.

ގޯލްޑަން ޓިކެޓު ގަންނަ ފަރާތްތަކަށް ލިބޭނެ ހިދުމަތްތަކަކީ ހަދިޔާ، ސްނެކްސް އަދި ބުއިމެވެ. ބްރޯންޒް ޓިކެޓަށް ހުރި ހިދުމަތަކީ ޝޯއަށް ވަނުމުގެ ފުރުސަތާއި ސްވެނިއާ އެކަންޏެވެ.

އެ ބޭންޑުން ބުނި ގޮތުގައި ޝޯ އޮންނާނީ މި މަހުގެ 23 ވަނަ ދުވަހުގެ ރޭ އޮލިމްޕަސްގަ އެވެ. ޝޯ ފަށާނީ އެ ރޭ 8:00 ޖަހާއިރުގަ އެވެ. މިއީ މި ބޭންޑުން މާލޭގައި ބާއްވާ ފުރަތަަމަ ލައިވް މިއުޒިކް ޝޯ އެވެ.