ދިވެހި މިއުޒިކް އިންޑަސްޓްރީގެ މަޝްހޫރު އަޑުގަދަ ލަވަކިޔުންތެރިޔާ ޓޯއި އޭނާގެ އާ ލަވައެއް ރިލީސްކޮށްފިއެވެ. "ވަށާފާރު" ގެ ނަމުގައި ނެރެފައިވާ މި ލަވައަކީ އޭނާގެ ތިންވަނަ އަލްބަމް 'ސިކްސް: ދަ އަންރިޓެން ޗެޕްޓާ' ގައި ހިމެނޭ ލަވައެކެވެ.

މި އަލްބަމް ރިލީސްކުރުމަށް ހަމަޖެހިފައިވަނީ މި މަހުގެ 18 ވަނަ ދުވަހުއެވެ. "ވަށާފާރު" އެއީ މި އަލްބަމް ނެރުމުގެ ކުރިން، އަލްބަމްގެ ޕްރޮމޯޝަން ލަވަ އެވެ.

ޖުމްލަ 20 ލަވަ ހިމެނޭ މި އަލްބަމްގެ "ވަށާފާރު" ޕްރޮޑިއުސްކޮށްފައިވަނީ ދިވެހި މިއުޒިކް އިންޑަސްޓްރީގެ ފަންނާނު ޝަހޫވޭންއެވެ. އަދި ލަވައިގެ އެނިމޭޝަން ވީޑިއޯ ތައްޔާރުކޮށްފައިވަނީ ވެސް ޓޯއިއެވެ.

"މި އަލްބަމްގައި ހިމެނޭ ލަވަތަކަކީ އަހަރެންގެ ހަޔާތުގެ ވާހަކަތައް ކިޔައިދޭ ލަވަތަކެއް،" ޓޯއި ވަނީ ބުނެފައެވެ.

މި އަލްބަމްގައި ސިމްބޮލިކް ރެކޯޑްސްގެ ގިނަ ފަންނާނުންގެ އަޑު އިވިގެންދާނެކަމަށް ޓޯއި ވަނީ ހާމަކޮށްފައެވެ. އެގޮތުން ޕެސްޓު، މާޓު، ޒިޔާ، ނައްލު، ޕެންޑާ، ޝާދިން، ނައިޑެން، މާނު، ސިރާޖް އަދި ތިފޫ ގެ އަޑު ލަވަތަކުން އިވިގެންދާނެއެވެ.

ރެޕް ލަވަތަކުން އެތައް ދިވެހިންނެއްގެ ޝައުގުވެރިކަން ހޯދާފައިވާ ޓޯއި އަކީ ސިމްބޮލިކް ރިކޯޑްސް (އެސްއާރް) ގެ އާޓިސްޓުންގެ ތެރެއިން އެންމެ ގިނަ ލަވަތައް ނެރެފައިވާ އެއް ފަންނާނެވެ. އަދި ރާއްޖޭގެ މަޝްހޫރު ރެޕް އާޓިސްޓް ޕެސްޓްއަށް ފަހު ދެން އެންމެ ގިނައިން ހިޕްހޮޕް ފޭނުން ބަލައިގަންނަ ފަންނާނަކީވެސް ޓޯއިއެވެ.

2013 ވަނަ އަހަރު އުފެއްދި ސިމްބޮލިކް ރެކޯޑްސްއަކީ ދިވެހިރާއްޖޭގައި ރަޖިސްޓްރީކުރެވުނު ފުރަތަމަ ރެކޯޑް ލޭބަލް ފޯމެޓް ކުންފުންޏެވެ. އެސްއާރުން އެންމެ ފުރަތަމަ ހިޕް-ހޮޕް އަދި ރެޕް މިއުޒިކަށް އަމާޒުކޮށް ލަވަ ނެރެމުން ދިޔަ ނަމަވެސް މިހާރު އެހެން ޖާންރާތަކުގެ ލަވަތައްވެސް ނެރެމުން ގެންދެއެވެ.