ގދ.ތިނަދޫ ފާލަމުގެ ވާހަކަ އަނެއްކާ ވެސް މި އަންނަނީ ދެކެވެމުންނެވެ. މިފަހަރު މި ވާހަކަ އަލުން ދެކެވެން ފަށައިގެން މި އުޅެނީ އާރްޑީސީއަށް ހުށައެޅި ސުވާލަކާއި ގުޅިގެން އެ އިދާރާގެ ޖަވާބު ބަޔާނެއް ސޯސަލްމީޑިއާގައި ދައުރުކުރުވަމުން ދިއުމާ ގުޅިގެންނެވެ.

މިއީ ކޮންމެ ވެރިކަމެއްގައިމެ ދައްކަން މަޖުބޫރުވެފައި އޮތް ވާހަކައެކެވެ. އެ ބުނާ ފާލަމަކީ، ތިނަދޫގައި މީހުން އާބާދުވިތާ 25 އަހަރު ފުރުމާ ގުޅިގެން އެ ރަށުގައި އެޅި ފާލަމެކެވެ. ފާލަން ގިނަ ދުވަސް ވުމުގެ ސަބަބުން ވީރާނާ ވެގެން އެހެން ފާލަމެއް އަޅަން ޖެހި، ކުރީގެ ރައީސް ޔާމީނުގެ ވެރިކަމުގައި ސްޓޯމް ކިޔާ އަމިއްލަ ކުންފުންޏަކާ މަަސައްކަތް ހަވާލުކުރީ އެވެ. އެއީ 2014 ވަަނަ އަހަރެވެ.

އޭގެ ފަހުގައި މި ހިނގި 11 އަހަރުގެ ތެރޭގައި މިއީ ބޮޑު ސަކަރާތްގަނޑެކެވެ. ބޮޑު ތާރީހެއް އޮތް ކަމެކެވެ. 2016 ވަނަ އަހަރު ހަމަ ޔާމީނުގެ ވެރިކަމުގައި އެ އެއްބަސްވުން އުވާލާފިއެވެ. ދެން ހަވާލުކުރީ އެމްޓީސީސީއާ އެވެ. ދެން ޔާމީނުގެ ނައިބު ރައީސް އަބްދުلله ޖިހާދު 2018 ވަނަ އަހަރު މި ފާލަން ރަސްމީކޮށް ހުޅުވައިދެއްވީއެވެ. 

އެއަށްފަހު އެމްޓީސީސީން ބުނީ އެ ކުންފުނިން އެ މަޝްރޫއު ނިންމައި ހަވާލުކުރީ ރަށު ކައުންސިލާ ކަމަށެވެ. އަދި "ޓޭކިން އޯވާ ސެޓްފިކެޓް" ދޫކޮށްދިނުމަށް އެދުމުން އެ ރަށުގެ ކައުންސިލުން އެ ކަން ކޮށްފައި ނުވާ ކަމަށް އެމްޓީސީސީ މި ފަހުން ނެރުނު ބަޔާނުގައި އެބަވެ އެވެ.

އެ ދޭތެރޭގައި އަނެއްކާ ތިނަދޫ ކައުންސިލުން އެމްޓީސީސީއާ ފާލަން ހަވާލުކުރީ ރެކްޓިފިކޭސަން މަސައްކަތްތަކެއް ކުރުމަށެވެ. އެ މަސައްކަތް ހަވާލުކޮށް މަސައްކަތް ފެށި ފަހުން އެ ރަށުގެ ކައުންސިލުން ފާލަމުގެ ރެކްޓިފިކޭޝަން މަސައްކަތުގެ ސްކޯޕަށް އިތުރު ބަދަލުތަކެއް ގެންނަން އެދުން ކަމަށް އެމްޓީސީސީ އިދާރާއިން ބުނެފައިވެއެވެ.

އެމްޓީސީސީން ބުނީ އެ ކައުންސިލުން އެ ހުށަހެޅި ބަދަލުތަކަކީ މަޝްރޫއަށް ކަނޑައަޅަފައިވާ ބަޖެޓަށް ވުރެއް އަގު ބޮޑު މަސައްކަތެއް ކަމަށެވެ. އެހެންކަމުން އެމްޓީސީސީން ހުށައަޅަފައިވާ ޕްރޮގްރެސް ޕޭމަންޓްތައް ލިބިފައި ނުވާތީއާއި ސްކޯޕްގެ އިތުރަށް ކުރަން ހުށައެޅި މަސައްކަތްތަކަށް ބަޖެޓް ހަމަޖެހިފައި ނުވާތީ އެ މަޝްރޫއުގެ މަސައްކަތް އޮތީ މިވަގުތު ކުރިއަށް ނުގޮސް މަޑު ޖެހިފައި ކަމަށެވެ.    

ދެން މި ޖެހުނީ ރައްޔިތުންގެ ކަންބޮޑުވުންތަކެވެ. ރައްޔިތުންގެ ކަންބޮޑުވުމަކީ މި ފާލަން ތިނަދޫ ރައްޔިތުންނަށް ބޭނުން ކުރެވޭނެ ދުވަހަކާމެދު އުފެދޭ ކަންބޮޑުވުންތަކެވެ. ރަށަކަށް އަރާ ފައިބާ ރައްޔިތުންގެ ތަކުލީފުތަކުގައި ރައްޔިތުން ދަނީ ކަންބޮޑުވަމުންނެވެ.

ޒިންމާ ނަގާނީ ކާކު ބާ އެވެ.؟